“Finiks” baş məşqçisini niyə qovdu?
Müntəzəm çempionatda keçirdiyi 82 oyunun yalnız 36-da qalib gələn və Qərb konfransında 11-ci yeri tutan “Finiks” baş məşqçi Mayk Budenholtseri istefaya göndərib.
Halbuki ötən ilin mayından bəri bu komandanı çalışdıran 55 yaşlı mütəxəssislə dəyəri 50 milyon dollar olan 5 illik müqavilə imzalanmışdı. Klubun bununla bağlı yaydığı açıqlamada deyilir:
“Hədəfimiz ən yüksək səviyyədə mübarizə aparmaqdı. Ancaq bu mövsüm ümidləri doğrultmadıq. Azarkeşlərimiz bundan artığını haqq edir. Dəyişikliklər zəruridi”.
ESPN-in yaydığı xəbərə görə, Budenholtserlə oyunçular arasında qarşılıqlı anlaşma baxımından problem yaranıb və bu da rəhbərliyin qərarına təsir göstərib.
Əslində rəhbərliyin məhz belə qərar vermək üçün tam əsası var. Məsələn, “Finiks”in üç lideri – Kevin Dürant, Devin Buker və Bredli Bil bu mövsüm “Detroyt”un bütün heyəti ilə müqayisədə daha çox qazanacaq. Halbuki “Finiks” mübarizəni dayandırıb, “Detroyt” isə pley-offda oynayacaq. Dürant, Buker və Bil bu mövsüm birlikdə 150,5 milyon dollar, “Detroyt”un bütün oyunçuları birlikdə 141,8 milyon dollar qazanacaq.
“Detroyt”un heç bir oyunçusunun qazancı 26 milyon dollardan artıq deyil. Bu komandanın ən yüksək ödənişli oyunçusu sayılan Tobias Harrisin mövsümlük qazancı 25,365 milyondu.
Digər xəbərlər
