Ötən ilin oktyabrında “Neftçi” “Səbail”i doğma meydanda 3:1 hesabıyla məğlub etmişdi. Ağ-qara rənglərə könül verən azarkeşlər nisbətən sakitləşib, gələcəyə ümidlə baxmağa başlamışdılar.

Zarafat deyildi, onların sevimli komandası yeni mövsümdə ilk qələbəsini qazanırdı. Özü də qələbənin altında “Sumqayıt”ı “Neftçi”yə dəyişən baş məşqçi Samir Abasovun imzası vardı. Onlar inanırdılar ki, pis günlər arxada qaldı, artıq irəlidə daha gözəl günlər var, “Neftçi” qələbələri sıralayacaq, turnir cədvəlinin ilk pillələrinə doğru sürətlə irəliləyib, medallar uğrunda mübarizəyə qoşulacaq. Hardan biləydilər ki, türklər demiş, pis günlər bitdi, indi irəlidə daha pis günlər gəlir...
Qayıdım “Səbail”lə oyundan sonraya. 3:1 hesablı qələbədən sonra Emin Mahmudov jurnalistlərin suallarını cavablamışdı. Suallardan biri Samir Abasovun “Neftçi”yə baş məşqçi təyinatıyla bağlı idi. Həmkarımla Emin Mahmudov arasında dialoq belə olmuşdu:

- Demək olar ki, “Səbail”lə oyun Samir Abasovun təyinatının düzgün qərar olduğunu göstərdi?
- Samir Abasovun gəlişi həmişə düzgün qərardı (gülür).

Bu dialoqdan sonra barmağımı dişləmişdim, “Neftçi”nin heyətində Roman Qriqorçukun yola salınmasını istəyən futbolçu qruplaşmasının olması haqda deyilənləri xatırlamışdım. Mahmudovun dediklərindən belə çıxırdı ki, futbolçular da Samir Abasovun gəlişini gözləyirmişlər, ukraynalı çalışdırıcının “Neftçi”yə baş məşqçi təyin olunmasını düzgün qərar saymırmışlar.

Həmin gündən təxminən 6 ay keçib. Zaman sübut edir ki, “Neftçi”nin problemi heç də baş məşqçi ilə bağlı deyilmiş. Baş məşqçidən əvvəl futbolçular dəyişməliymiş. Çünki onlar böyük hədəflərə çatmaq uğrunda savaşmağa azır deyilmiş.

Bu yaxınlarda “Neftçi”nin “milliləşdirilmiş” futbolçusu Filip Ozobiçin müsahibəsini oxudum. Xorvatiyalı deyir ki, özündə oynamağa güc hiss edir, hələ bir müddət oynamağı düşünür. İnsafən, Ozobiç hazırkı “Neftçi”nin ən yaxşılarındandı, zaman-zaman nəticəyə də təsir edir. İndi özünüz düşünün, ən yaxşılarından biri 34 yaşlı Ozobiç olan “Neftçi”nin digər futbolçuları hansı səviyyədədi?! Əlbəttə, hazırkı heyətdə Ozobiç fərqlənəcək, faydalı görünəcək. Amma onun da faydası ən uzağı, “Neftçi”nin 6-cı pillədə “möhkəmlənməsinə” yetəcək qədərdi. Bundan artığı mümkün deyil.

Qayıdıram Emin Mahmudova. Samir Abasovun gəlişinə sevinən, bunu düzgün qərar adlandıran sabiq kapitan, “Neftçi”nin liderlərindən biri çoxdan ortalıqda yoxdu. Nə vaxt baxırsan, zədəlidi. İnternetdə adıyla bağlı axtarış verənin qarşısına saysız-hesabsız “Emin Mahmudov zədələndi” xəbərləri çıxır. Bu proses necə baş verdi, Mahmudov harda, hansı oyunda ciddi zədə aldı? Xatırlamağa çətinlik çəkirəm. Görünən odu ki, yaxın müddətdə meydana qayıtmağı da planlaşdırmır. Eminin istedadına, xarakterinə böyük ümidlər bəsləyirdik. Amma ən yaxşı günlərində pula yenik düşən, karyerasında durğunluq yaranan futbolçu keçmiş günlərindən çox uzaqdadı. Əvvəl kapitanlığı əldən verdi, indi də futbolçu keyfiyyətlərini.

Halbuki çətin məqamda sinəsini irəli verməli, “Neftçi”nin ağır yükünü komanda yoldaşları ilə daşımalıydı. O isə bunu arzulamır. Bir vaxtlar bu cür davranışı Eddi İsrafilovdan, Höccət Hacıyevdən görürdük. İndi Emin Mahmudov, Ramil Şeydayev kimi yüksək məvacib alan və azarkeşlərin böyük ümidlər bəslədiyi futbolçular da belə edir. Çətin məqamda ya zədə adıyla gün keçirirlər, ya da meydana çıxanda ayaqlarını sürüməklə, ora-bura vurnuxmaqla məşğul olurlar. Çox təəssüf...

AMAL