Norveç təmsilçisi ''Bryune'' qeyri-adi və məzəli xəbərlərlə gündəmə gəlməkdə davam edir.

Bilindiyi kimi bu klub təmsil etdiyi bölgənin kənd təsərrüfatı və heyvandarlıqla sıx əlaqəsini nəzərə alaraq hər dəfə matçın ən yaxşısı seçilən futbolçusuna qeyri-adi hədiyyələr verir. İlk turda ''Bude/Qlimt''lə ev oyununun ən yaxşısı seçilən qapıçı Yan de Bura yumurta hədiyyə edilmişdi.

Rəhbərlik bu cür hərəkətlərlə həm klubu, həm də regionu bir növ reklam edir. Bu dəfə ''Bryune'' 3-cü turda öz meydanında ''Hauqesun'' ilə qarşılaşıb. Bu il 22 illik fasilədən sonra ilk dəfə elitaya vəsiqə qazanan ''Bryune'' nəhayət, mövsümdə ilk qələbəsini qazanıb. 3:1-lik qələbədən sonra isə matçın ən yaxşı oyunçusu seçilən Aksel Kryugerə quzu hədiyyə edilib! 22 yaşlı bu müdafiəçi penaltidən fərqlənməklə qələbənin əsasını qoyub.

''Bryune'' daha çox Erlinq Holannı yetişdirən klub kimi tanınır. 13 min əhalisi olan bu şəhər Norveçin 3-cü böyük şəhəri olan Stavangerdən cəmi 30 dəqiqəlik məsafədə yerləşir. Komanda ev oyunlarını 5 minlik stadionda keçirir.

Bundan başqa ''Bryune'' fanatlarına maraqlı VİP-biletlər teklif edir. Həmin biletlərin sahibləri oyuna stadionun kənarındakı traktorun qazma mexanizminin üzərində əyləşərək baxırlar.