"Komandamız bu gün yaxşı çıxış etdi" - Vitali Borisov
Millimizin baş məşqçisi Vitali Borisov futzal üzrə AÇ-2026-nın əsas mərhələsində Xorvatiyaya 1:4 hesabı ilə uduzduqları oyunu şərh edib.
"Football-plus.az" xəbər verir ki, o, matçla bağlı təəssüratlarını bölüşüb:
"Güclü rəqibə qarşı oynadıq. Xorvatiya millisi qrupda keçirdiyi 6 oyunun hamısında qələbə qazandı və maksimum xalla Avropa çempionatının final mərhələsinə yollandı. Komandamız bu gün yaxşı çıxış etdi. Adətən ikinci hissədə çatdırmırdıq və oyundan qopurduq. Bu dəfə güclü rəqibə qarşı yaxşı mübarizə apardılar. Heyətimizdə zədəli futzalçı çoxdu. Əksəriyyəti ağrıkəsici hesabına meydana çıxmışdı. Ancaq bunu hiss etdirmədilər".
Mütəxəssis yığmamızın heyətindən kənarlaşdırılan qapıçı Rövşən Hüseynli haqda da söz açıb: "Rövşən Hüseynli ilə bağlı nə lazımdırsa danışmışıq, məlumat vermişik. Onu bu toplanışdan kənarlaşdırmışıq, amma millinin qapıları növbəti toplanışlarda onun üzünə açıqdı. Bu, hamımızın millisidi. Bu gün buraxdığımız qolların heç birində qapıçının səhvi olmadı".
Digər xəbərlər
