"Sumqayıt" Misli premyer-liqasının 30-cu tur matçında evdə "Şamaxı"ya uduzdu - 1:2.

"Football-plus.az" xəbər verir ki, "kimyaçılar"ın baş məşqçisi Vaqif Cavadov oyunsonrası mətbuat konfransında jurnalistlərin suallarını cavabladı.

- Üzücü məğlubiyyət yaşadıq. Hər iki hissədə yaxşı oyun nümayiş etdirdik. Rəqibi təbrik edirəm.

- Sanki komandada motivasiya problemi var.
- Bəli, ola bilər. Bu yöndə çalışırıq. Futbolçular özü də dərk etməlidi ki, hələ çempionat bitməyib. Futbolçuların performansı növbəti mövsümlə bağlı müqavilələrinə təsir edəcək. Ardıcıl və gözlənilməz qollar buraxdıq. Siz də şahid olduz ki, çox yaxşı oynadıq. 90 dəqiqə mübarizə apardıq ki, məğlub olmayaq.

- Rövlan Muradov start heyətindəki yerini itirib?
- Onunla bağlı suallar çoxdu. 18 oyunda əsas heyətdə meydana çıxıb. Onun meydanda olduğu 11 matçda komanda qol vura bilməyib. Bu gün Sərtan Taşkın daha yaxşı oynayırsa, ona şans verməliyik. Rövlanla danışmışam. Mənim üçün yaxşı futbolçudu.

- Azarkeşlər, təxminən, 70-ci dəqiqədən sonra sizə dəstək şüarları səsləndirsə də, sonda sərt ifadələr işlətdilər. Sizi axtarırdılar.
- Azarkeşlərdən üzr istəyirəm. Belə oyunda məğlub olmaq mənə çox pis təsir etdi. Həmişə azarkeşlərlə birgə olmuşam. Bu dəfə nəticə üzündən birbaşa soyunub-geyinmə otağına gəldim.

- Futbolçularınız bir-biri ilə mübahisə edir. Komandanın içində ab-hava necədi?
- Heç kim heç kimlə mübahisə etmir. Nəsə problem axtarmaq lazım deyil. Futbolda belə hallar olur.

KƏNAN BAHADIR