“Neftçi”nin baş məşqçisi Samir Abasov son vaxtlar hakimlərdən çox narazılıq edirdi.

İş o yerə gəlib çatdı ki, Samir bəy “Kəpəz”lə kubok oyunundan sonra “VAR-ı futboldan rədd etmək lazımdı” deməyə də cürət etdi. Amma onun hakimlərimizdən narazılığı bununla da bitmədi. Ondan sonra az qala hər oyundan sonra Abasov ədalət təmsilçilərinin ünvanına deyinməyə, narazılıq etməyə davam etdi. Bəzən üstüörtülü, bəzən də üstüaçıq. Onun belə davranışı bir qədər də vəfazılıq elementləri ilə zəngin idi. Çünki ötən mövsüm Samir Abasov “Sumqayıt”da çalışarkən elə həmin hakimlər onun komandasının “yanındaydı”. “Qara paltarlı adamlar” əllərindən gələni etdilər ki, “Sumqayıt” Azərbaycanı avrokuboklarda təmsil etsin, Konfrans Liqasında iştirak etməyə vəsiqə verən yerlərdən birini tutsun. Bunun üçün hətta ölkənin ən qocaman klubu sayılan “Neftçi”nin başına oyun açmaqdan belə çəkinmədilər.

Biz həmin vaxt da bunları görürdük və yazmaqdan çəkinmirdik. Bir az da uzaqlara boylananda azərbaycanlı hakimlərin Samir Abasova daha böyük xidmətlər göstərdiyini görərik. Elə “Neftçi”nin sonuncu çempionluğunu qazandığı oyunu xatırlayaq. Hansı ki, həmin o çempionluq Samir Abasovun “şəxsi işi”nə qızıl hərflərlə yazılıb, onun haqqında danışılanda ilk yada düşən məhz qızıl medallar olur. Həmin qızıl medalları Mərdəkandakı həlledici oyunda FİFA referisi Elçin Məsiyev az qala zorla “Qarabağ”ın futbolçularının boynundan çıxarıb “Neftçi”nin futbolçularına verdi. Detallara varmağa, ayrı-ayrı epizodlar üzərində çox dayanmağa ehtiyac görmürəm. Hər halda, bizim yaddaşımız o qədər də korlanmayıb.

Kim bilir, bəlkə də hansısa “gizli əl” ona bu xidməti göstərməyi özünə borc bilir. Çünki “Neftçi”nin baş məşqçisi bu mövsüm bir neçə dəfə hakimlər, VAR sistemi ilə bağlı sərt açıqlamalar versə də, AFFA İntizam Komitəsi nəinki onu cəzalandırıb, heç xəbərdarlıq etməyi də lazım bilməyib. Özü də Samir Abasovun “vəfasızlığına” rəğmən, hakimlərimiz onun komandasından köməyini əsirgəmir.

“Sabah”la ölkə kubokunun yarımfinalının ilk qarşılaşmasında yaşananları hamı gördü. Yuri Matias az qalmışdı ki, Coy-Lens Mikelsin ayağını yerindən qoparsın. Həmin epizodda VAR hakimləri meydandakı həmkarlarına kömək edib, ədalətin bərpasına çalışmadılar. Belədə “Neftçi”nin də qapısına penalti təyin olunmadı. Penalti o qədər açıq-aşkar idi ki, sonradan Hakimlər Komitəsinin sədri Frank De Blekere də “hücumçunun ayağına təmas aşkar şəkildə görünür. Buna görə də biz penalti və VAR müdaxiləsini gözləyirdik” açıqlamasını verməyə məcbur oldu.

Həmin o penaltini verməyən ədalət təmsilçiləri Şamaxıda “Neftçi”nin könlünü yenidən xoş etdilər. Filip Ozobiçin “Şamaxı”nın cərimə meydançasında yüngül toxunuşla yerdə qalmasını Fərid Hacıyev penalti təyin etməyə əsas verən qayda pozuntusu kimi qiymətləndirdi. Penaltini qəribə vuruşla qapıdan keçirən Ramil Şeydayev də uzun fasilədən sonra hücumçu olduğunu xatırladıb, adını tabloya qol müəllifi kimi yazdırmağı bacardı.

Xoşbəxtlik üçün bundan artıq nə lazımdı?! Ümid edirəm ki, bundan sonra Samir bəy hakimlərdən də, hücumçusundan da razı qalacaq. Narazı olmaq üçün səbəb yoxdu.

AMAL