Görəsən, Samir Abasov özünü sonuncu dəfə nə vaxt günahkar hiss edib?

“Sumqayıt”ı çətin vəziyyətdə qoyub “Neftçi”nin xilaskarı olmaq qərarı verəndəmi? “Qarabağ”la matçda 0:3 hesabıyla geridə olduqları halda, beşinci əvəzetməni reallaşdırmaq haqqından yararlanmaq yerinə azarkeş roluna yiyələnəndəmi? “Ağ-qaralar”ı meydana çıxardığı 12 premyer-liqa matçından yalnız dördündə qələbə qazanandamı? Qış təlim-məşq toplanışı çərçivəsində bircə yoxlama oyunu belə keçirməyəndəmi? “Transfer pəncərəsi”ndən layiqincə istifadə edə bilməyəndəmi?

Samir Abasov özünü nə vaxt “sudan quru çıxarıb”? Hər uğursuz nəticədən sonra! Günahkar ya futbolçuların psixoloji durumu olub, ya da fiziki hazırlığı. Əminəm ki, “ağ-qaralar”ın maliyyə problemi olsa, bu da qabardılacaqdı. Ona görə ki, Abasov “Sumqayıt” dövründə dəfələrlə həmin məsələni ön plana çıxarıb. Hələ infrastruktur məsələsini demirəm.

“Neftçi”də çatışmayan nədi? Və ya ilk 6 pillədə qərarlaşan komandalar hansı baxımdan “ağ-qaralar”dan üstündü? Yalnız qazandığı nəticələrdə! Şübhəsi olan “Qarabağ”ı bir qədər istisna etməklə “Neftçi”ni bütün göstəricilərə əsasən qalanlarıyla müqayisə edə bilər. Onda hər kəs biləcək ki, problem həm də Samir Abasovdadı. Bəhanələrə sığınan, futbolçuların psixoloji durumunun ürəkaçan olmadığını bilə-bilə, daha da sıxan, bəzən dolayı, bəzən də birbaşa yolla onları suçlayan baş məşqçidə!

Mənə inanmırsız? Yuxarıdakı konkret sübutlar sizi qane etmədi? Birini də deyim. Samir Abasov 20-ci tur çərçivəsində “Araz-Naxçıvan”la keçirilən matçın 46-cı dəqiqəsində 4 (!) futbolçunu əvəzlədi. Bu, start heyətini yanlış seçməklə bağlı acı etiraf deyilmi? Tamam, yoxsa kubok vədiylə vaxt qazanmağa davam?

KƏNAN BAHADIR