Bir müddət öncə ''Trabzonspor''un başına keçən və artıq bu vəzifədə debüt oyununu da keçirən Fatih Təkkənin Rusiyaya yollanmaqdan imtina etməsi müəyyən söz-söhbətlərə səbəb olub.

''Football-plus.az'' xəbər verir ki, bu il mayın 25-də ''Zenit''in 100 illik yubileyi qeyd olunacaq. Bununla bağlı 24-26 mayda keçiriləcək tədbirlərə klubun bir çox sabiq futbolçuları və məşqçiləri dəvət alıb. Təbii ki, sabiqlər arasında futbol matçının keçirilməsi də nəzərdə tutulub.

Dəvət olunanlar arasında Fatih Təkkənin də adının olması normaldı. Təkkə 3 il (2006-09) ərzində Sankt-Peterburq klubunda böyük iz buraxaraq UEFA kuboku, Avropa superkuboku, ölkə çempionluğu və ölkə superkubokunu qazanmağa müvəffəq olmuşdu. Amma 47 yaşlı mütəxəssis işlərinin çoxluğunu və təqvimin sıxlığını əsas gətirərək ''Zenit''in təklifini geri çevirib. O, Türkiyə mətbuatına açıqlamasında bunları deyib:

Maraqlıdı ki, Rusiyada bəziləri bunu ''Trabzonspor''da 3 ukraynalı futbolçunun top qovması ilə əlaqələndirib. Qaradənizlilərdə hazırda Ukraynadan olan Arseni Bataqov, Daniil Sikan və Aleksandr Zubkov çıxış edir.

Təkkənin imtinasının ukraynalılarla əlaqəli olub-olmadığı bilinməsə də, qeyd etmək yerinə düşər ki, həmin tarixdə, yəni mayın 25-də ''Trabzonspor''u ''Samsunspor'' ilə derbi gözləyəcək. Amma açıq-aydın Rusiyanın Ukraynaya təcavüzünü səbəb kimi göstərərək ''Zenit''in təklifini geri çevirənlər də var. Bunlardan biri Vlastimil Petrjeladı. 2003-06-cı illərdə ''Zenit''i çalışdıran təcrübəli çexiyalı mütəxəssis 2007-08-ci illərdə ''Neftçi''də də işləyib. Petrjela çəkinmədən ''Rusiyaya gəlsəm, məni Çexiyada öldürərlər'' açıqlamasını verib.