Millimiz Belarusa qarşı keçirdiyi yoldaşlıq oyununda uduzdu - 0:2.

"Football-plus.az" xəbər verir ki, yığmamızın baş məşqçisi Fernando Santuş oyunsonrası mətbuat konfransında jurnalistlərin suallarını cavabladı.

- Birinci hissədə hər iki komanda intensiv oyun nümayiş etdirdi. Futbolçularım ilk 15-20 dəqiqə ərzində daha çox müdafiəyəmeyilli çıxış etdilər. Biz onlara irəli atılmalı olduqlarını dedik. Kollektivlər təhlükəli qol epizodları yaratdı. İki qol buraxdıq. İkinci yarıda oyuna yaxşı başladıq. Xəyal mükəmməl oyun sərgilədi. Bir müddət sonra Renat Dadaşovu meydana çıxardım. O, iricüssəlidi. Bu futbolçunun sayəsində topu itirməməyə çalışırdıq. Şahin Şahniyarovun da oyuny yaxşı alındı. Sadəcə, bir az çətinlik çəkdi. Təəssüf ki, bəsit qollar buraxdıq. Bu cür hallara görə çox üzülürük. Hesabda geri düşsək də, irəli atılmaqdan çəkinmədik. Komandamın qol vura biləcəyini hiss edirdim. Buna görə, cinahlardan hücuma keçsək də, ikinci qolu buraxdıq. Yüksək səviyyəli rəqabətdəsənsə, belə qollar buraxmamalısan. Amma unutmayaq ki, bəzi futbolçular ilk dəfə idi ki, millinin formasını geyirdi. Onlar yığmada oynamaq üçün bacarıqlı olduqlarını sübut etdilər.

- Millimizin məğlubiyyət limiti nə vaxt tükənəcək?
- Biz uduzmamaq üçün hər şeyi edirik. Oyunçularım əllərindən gələni edir. Məsələn, Toralın epizodu uğurlu alınsaydı, hər şey başqa cür olardı.

- Zamiq Əliyev yenə səhv etdi. Onu yenə start heyətində meydana buraxmaq niyyətiniz var?
- Səhv etmirəmsə, onun 20 yaşı var. Gənc futbolçular davamlı oynanmalı, özünə inanmalıdı. Onları dərhal itirməməliyik. Səhv etməkdən qorxsa, inkişaf edə bilməyəcək.

- Qismət Alıyevi niyə milliyə cəlb etməmisiz?
- Amin Seydiyev və Mərt Çəlikin oyununu daha çox bəyəndim. Üç gün əvvəl deyirdiz, filankəs niyə oynamadı. İndi də başqasını soruşursuz...

- Portuqaliya Futbol Federasiyasının rəhbərliyi 8 oyundan 7-də uduzan əcnəbi məşqçini komandada saxlayar, yoxsa yox?
- Milli komandayla 109 oyun keçirmişəm və cəmi 20-də uduzmuşam. Portuqaliyayıa Azərbaycan millisini müqayisə edə bilməzsiz. Portuqaliyada iki oyun uduzsan, istefaya göndərəcəklər. Mən heç vaxt ardıcıl iki matçda uduzmamışam. Avropa çempionu və Millətlər Liqasının qalibi olmuşam. Bu sualı federasiyaya vermək lazımdı, mənə yox.

- Futbol ictimaiyyəti və azarkeşlər məğlubiyyətlərə görə əsəbidi. Nəticələrə görə üzr istəmək istəyirsiz?
- Üzr istəmək başqa şeydi. Əlbəttə, azarkeşləri sevindirməliyik. İnanın ki, indi hamı eyni hissləri keçirir. Nəticələrə görə üzülürük. Əlimizdən gələni etməliyik ki, vəziyyəti yaxşı mənada dəyişək. Kifayət qədər gücümüz var. Azərbaycanlı azarkeşlərin, futbol ictimaiyyətinin sevinəcəyi günlər gələcək. Bunun asan məsələ olmadığını dərk edirəm. Düşündüyümdən daha çox vaxt lazımdı. Burdan 1 və ya 2 illik təklif alsaydım, qəbul etməzdim. Bəlkə də indi hamıdan çox mən üzgünəm. Karyeram ərzində bu qədər uduzmamışdım. Öz işimə, futbolçuların potensialına inanıram.

KƏNAN BAHADIR