Srağagün yığmanın baş məşqçisi Fernando Santuş AFFA-da keçirilən mətbuat konfransında Haiti və Belarusa qarşı keçiriləcək yoldaşlıq oyunları üçün heyətini açıqladı.

Hər şey yaxşı başladı. Portuqaliyalı mütəxəssisin dilindən azərbaycanlı futbolçuların adını eşitməyə başladıq. Düzdü, o, isimləri tələffüz etməkdə çətinlik çəkdiyindən siyahını tamamlasa belə, futbolçularının hamısının adını anlamaqda ciddi çətinliklə üzləşdim. Lakin AFFA-nın Mətbuat və İctimaiyyətlə Əlaqələr Departamentinin rəhbəri Elnur Məmmədlinin yenidən adları sadalamasından sonra hər şey aydın oldu.

Rza Cəfərov, Şahruddin Məhəmmədəliyev, Aydın Bayramov... Çox gözəl... Yaxşı irəliləyirik... Xəyal Əliyev və Ağadadaş Salyanskinin də milliyə çağrıldığını eşidəndə sevincdən özümə yer tapa bilmədim. Gənc futbolçular ilk dəfə millimizin formasını geyəcək, bayrağımızın, himnimizin şərəfini qoruyacaq... Hətta 1-ci liqa təmsilçisi “Qəbələ”nin futbolçusu Şahin Şahniyarovun da bu sırada olduğunu eşidəndə sevincdən qanad açıb uçmaq üzrə idim... Amma... Ardınca Mahir Emrelinin adı səsləndi ki, Aşiq Ələsgər demişkən, sındı qol-qanadım, yanıma düşdü! Nə?! Mahir?! Yuxudayam?!

Təəssüf ki, yox... Cənab Santuş həmkarlarımın suallarına cavab verir, daha doğrusu, ittihamlardan yaxa qurtarmaq üçün sağa-sola vurnuxur, söz bazasını işə salır, ən ləzzətli vədlərlə vaxt qazanır, insanlığın ən böyük silahından istifadə edir: ümid verir...

Deməli, oyağam, yaşananlar qorxulu yuxu deyil... Deməli, Mahir milliyə dəvət alıb... Baxmayaraq ki, o, sonuncu dəfə ötən il dekabrın 31-də 90 dəqiqə meydanda olub. “Nürnberq”in futbolçusu son 5 matçın yalnız birində meydana çıxıb və 12 dəqiqə oynayıb. Birində əvvəldən sona qədər ehtiyat oyunçular skamyasında əyləşibsə, qalanında, ümumiyyətlə, iştirak ərizəsinə daxil edilməyib. Almaniyanın 2-ci bundesliqasında mövsümün ikinci yarısı yanvarın 19-da start götürüb. Mahir mümkün 8 matç, yəni 720 dəqiqə ərzində cəmi 174 dəqiqə top qovub. Hələ sonuncu qolunu ötən il noyabrın 3-də vurduğunu demirik. Oxucularımız onun “Nürnberq”dəki macəralarından da xəbərdardı.

Belədə Mahir hara, yığma hara, cənab Santuş, can Santuş?!

KƏNAN BAHADIR