Lider “Dinamo” LNZ ilə səfər oyununda çətin qələbə qazandı.

Vivçarenkonun erkən qoluna Roman Qriqorçukun çalışdırdığı meydan sahibləri 2-ci hissənin əvvəlində cavab verdi. Son dəqiqələrə qədər hər iki komandanın hesabı dəyişmək imkanı var idi. Kiyevlilərin son hücumlarından biri LNZ üçün sarsıdıcı nəticə ilə bitdi. Çerkassklıların qapıçısı Kuçerenko Brajkonun zərbəsini qaytarmaq üzrə olarkən Putrya araya girdi və topu öz qapısına göndərdi.

Meydana “Aleksandriya”dan bir gün əvvəl çıxan “Şaxtyor” turun mərkəzi oyununda “Krivbass”ı yenəcəyi təqdirdə uzun fasilədən sonra 2-ci pilləyə yüksələ bilərdi. Amma Lvovda keçirilən oyun heç-heçə bitdi. Mendosa 57-ci dəqiqədə Krivoy-Roq klubunu önə keçirdi. Hadisələrin belə axarı ilə razılaşmayan Marino Puşiç birdən-birə üç oyunçunu əvəzlədi. Onun bu gedişi dərhal nəticə verdi.

Bondarenko meydana çıxandan cəmi bir dəqiqə sonra hesabı bərabərləşdirdi. “Şaxtyor”un bundan artığına gücü çatmadı. Baxmayaraq ki, Puşiçin növbəti əvəzetmələrindən sonra meydanda cəmi iki nominal müdafiəçi qalmışdı.

“Dinamo” ilə çempionluq mübarizəsində “silahı yerə qoymaq” istəməyən “Aleksandriya” “Kolos”un qonağı idi. Əvvəlki 19 oyunda cəmi 16 qol buraxan Kovalyokva klubu 42-ci dəqiqədə qapısına top gördü və bunun cavabını verə bilmədi.

Turun qalan oyunlarına gəlincə, Emil Mustafayevin şərəfini qoruduğu “Çernomorets” səfərdə “Polesye”yə uduzmaqla turnir vəziyyətini bir qədər də çətinləşdirdi. Soydaşımız bu oyunda meydana çıxmadı. Odessa klubundan fərqli digər autsayder “Vorskla” “Karpatı” ilə oyunda xal qazandı. “Levıy bereq” mövsümdə 2-ci dəfə “Veres”i məğlub etdi.

Son turlarda nəticələrini yaxşılaşdıran “Zarya” “Obolon” üzərindəki qələbə sayəsində 6-cı pilləyə yüksəldi. “Rux” isə aşkar autsayder “İnqulets”in qapısından qələbə topunu 8-ci uzatma dəqiqəsində keçirdi.

20-ci tur
LNZ – Dinamo 1:2
Yaşari, 49 – Vivçarenko, 11. Putrya, 89-öz qapısına.
Dinamo: Neşeret, Vivçarenko, Karavayev, Popov, Mixavko, Buyalski (Pixalenok, 71), Mixaylenko (Gerrero, 71), Yarmolenko (Brajko, 71), Vanat, Kabayev, Şaparenko (Rubçinski, 84).

Şaxtyor – Krivbass 1:1
Bondarenko, 66 – Mendosa, 57.
Şaxtyor: Riznık, Bondar (Qomes, 65), Vinisius (Neverton, 84), Matviyenko, Pedro Enrike, Krıskiv (Bondarenko, 65), Nazarina, Sudakov, Kevin (Traore, 84), Eginaldo, Şved (Elias, 65).

Kolos – Aleksandriya 0:1
Şepelev, 42.

Polesye – Çernomorets 3:1
Batista, 5. Andriyevski, 42. Qutsulyak, 78 – Yanakov, 57-p.

Vorskla – Karpatı 0:0

Levıy bereq – Veres 2:0
Vovçenko, 11-öz qapısına. Şastal, 59.
Zarya – Obolon 2:1

Miçin, 43; 62 – Karas, 69.

İnqulets – Rux 0:1
Pritula, 90+8.

1. Dinamo 20 15 5 0 42-13 50
2. Aleksandriya 20 13 5 2 29-16 44
3. Şaxtyor 19 12 4 3 46-16 40
4. Polesye 20 9 7 4 28-17 34
5. Krivbass 19 9 5 5 23-19 32
6. Zarya 19 9 1 9 23-23 28
7. Karpatı 20 8 4 8 23-23 28
8. Rux 20 6 8 6 22-17 26
9. Veres 20 6 7 7 22-27 25
10. Levıy bereq 20 6 4 10 12-21 22
11. LNZ 20 6 4 10 20-29 22
12. Kolos 20 3 9 8 13-17 18
13. Obolon 20 4 6 10 12-31 18
14. Vorskla 20 4 6 10 16-27 18
15. Çernomorets 20 4 3 13 14-30 15
16. İnqulets 19 2 6 11 14-33 12

Bombardirlər: Vanat (Dinamo) – 11, Sudakov (Şaxtyor), Qutsulyak (Polesye) – 10.