“Bu məsələyə mütləq baxılacaq” – Mərdəkandakı yumruq davasına görə kimlər cəza alacaq?
Misli premyer-liqasının 26-cı turu çərçivəsində keçirilən “Araz-Naxçıvan” – “Qarabağ” matçının (1:3) 81-ci dəqiqəsində yaşanan biabırçı olaydan xəbərdarsız. Yassin Benzyanın Felipe Santosu qıcıqlandırmağa hesablanan davranışı nəticəsində yaşanan yumruq davası futbolçuların qırmızı və sarı vərəqələr almasıyla nəticələndi.
Təbii ki, burda “Qarabağ”ın futbolçularına daha ağır cəzalar tətbiq edilməliydi. Amma hadisənin mərkəzində yer alan bəzi “Qarabağ”lılar sarı vərəqə belə almadı.
İndi “Araz-Naxçıvan” AFFA İntizam Komitəsinin olayla bağlı qərarlarını gözləyir və ümid edir ki, qurum hakimlər briqadasının sözün əsl mənasında tapdaladığı ədaləti bərqərar edəcək.
Bəs, bu yöndə ümidli olmağa dəyərmi? Bundan sonra haqsız qərarlarla bağlı ölçü götürülməsi mümkündümü?
“Football-plus.az”ın suallarını AFFA İntizam Komitəsinin sədri Erkin Hüseynov cavabladı:
“Bu məsələyə növbəti iclasda mütləq baxılacaq. Həm AFFA nümayəndəsinin, həm də baş hakimin qeydlərinə əsasən müvafiq qərarlar qəbul ediləcək. İş orasındadı ki, hakimin verdiyi qərarları dəyişmək bizim səlahiyyətlərimizə daxil deyil. Biz yalnız onların təqdim etdiyi vərəqələrdə yazılanlara əsasən sanksiya tətbiq edirik. Bu yöndə qanunlar nə deyirsə, onu da edəcəyik. Amma hakim hansısa cəza almalıdısa, bunu Hakimlər Komitəsi edə bilər”.
KƏNAN BAHADIR
