Martın 1-nə təyin olunmuş “Hypers Quba” – “Şəmkir” oyunundan əvvəl qonaqların 21 nömrəli futbolçusu Məmməd Məmmədovun maykasının yoxa çıxmasını və onun bu səbəbdən meydana çıxa, oyunda iştirak edə bilməməsini araşdırmağa ehtiyac yaranıb.

Mən 10 il Quba Olimpiya Komitəsində rəhbər vəzifədə çalışmış və stadiona nəzarət etmişəm. Qonaq komandanın paltardəyişmə otağı yerli komandanın, hakimlərin və AFFA nümayəndələrinin paltardəyişmə otaqlarından 50 metr kənarda yerləşir. Hər iki komandanın otağının açarı komanda üzvlərində olur, ora nə azarkeşlər, nə kompleksin işçiləri, nə də rəqib komandanın üzvləri daxil ola bilər. Komandaların və kompleksin mühafizəçiləri, həmçinin Quba rayon Polis Şöbəsinin əməkdaşları paltardəyişmə otağının yaxınlığına heç kimi buraxmırlar.

Quba Olimpiya Kompleksinin, Quba rayon MKTB-nin işçiləri, “Hypers Quba” komandasının üzvləri meydançanı qardan təmizləyib və oyun vaxtında başlayıb. Şaxtalı havada qazonun oyuna tam və vaxtında hazır olmasında əməyi olanlara – AFFA nümayəndəsi Emin Cəfərova, hakim-inspektor Vüsal Əliyevə, Quba Olimpiya Kompleksinin rəhbərliyinə, xüsusən də Rəşad müəllimə və işçilərinə, “Hypers Quba”nın hər bir üzvünə, klub prezidenti Ayaz Abdullayevə futbol azarkeşləri adından minnətdarlığımı bildirirəm.

Hörmətli “Futbol+” qəzeti! Sizdən əməkdaşınızı Qubaya göndərməyi və hadisəni yerində araşdırmağı xahiş edirəm. Onu da bildirmək istəyirəm ki, “Şəmkir” oyundan bir gün əvvəl Qusara gəlib və Samur postu yaxınlığındakı oteldə qalıb, “Şirvanovka”nın stadionunda məşq edib. “Şəmkir”in 21 nömrəli oyunçuna məxsus formanın Quba Olimpiya Kompleksində məhz “Hypers Quba”nın günahı üzündən itdiyi sübut olunarsa, həm bu klubun rəhbərliyi, həm də öz adımdan üzr istəməyə hazıram. Eyni zamanda “Şəmkir”ə təzminat kimi bir komplekt idman forması verməyə hazırıq. İstərdim ki, “Şəmkir” bunu təhqir kimi qəbul etməsin. Hər halda, bir oyunçunun problemini bütün komandaya aid etmək olmaz”.

Hörmətlə, AFFA-nın Şimal Regional Futbol Federasiyasının İdarə Heyətinin üzvü, sabiq futbol hakimi və hakim-inspektoru, Quba və Qusarın “Şahdağ” klublarına rəis vəzifəsində çalışmış, “Hypers Quba”nın idman direktoru Akif Əliyev