Fevralın 10-da Misli premyer-liqasında qış “transfer pəncərəsi” bağlandı. Bilindiyi kimi, bəzi komandalar bu müddətdə həm heyətini gücləndirdi, həm də oyunçularla yolları ayırdı.

Bəs, heyətlərin yenilənməsi yönündə hərəkətlilik nə ilə yadda qaldı?

Premyer-liqaya 22 legioner gəldi ki, onlardan ikisi – Kari Borgeslə Əyyub Allaş əvvəl də Azərbaycan çempionatında çıxış edib. Yerli futbolçularla bağlı transfer prosesində isə 8 ad var. Bu sırada ən çox diqqəti çəkən dəyişikliklər bir il futbolsuz qalan Mirabdulla Abbasovun “Səbail”ə, Elvin Camalovun “Sabah”dan “Neftçi”yə, Cəlal Hüseynovun isə Bolqarıstan “Arda”sından “Şamaxıya” gəlişidi. Heç bir transfer etməyən komanda “Zirə”, heç kimlə yolları ayırmayan isə “Araz-Naxçıvan”dı.

Maraqlıdı ki, avrokuboklara vəsiqə uğrunda mübarizə aparan 5 komandadan yalnız ikisi – “Sabah” və “Turan Tovuz” bir qədər fəal göründü. Elitada qalmaq uğrunda mübarizə aparan üç komandaya gəlincə, “Kəpəz” fürsətlərdən maksimum yararlanmağa çalışdı. “Şamaxı” “ağını çıxardı” desək, yanılmarıq. Ona görə ki, 7 futbolçu alan “şirlər” ən çox transfer edən komandadı. “Səbail” isə fiasko yaşadı. Onsuz da kasad heyətə malik “dənizçilər”, demək olar ki, güclənə bilmədi.

“Transfer pəncərəsi”nin uzun müddət xatırlanacaq hadisələri “Qarabağ”ın başına gəldi. Juninyo və Romao ilə yollarını ayıran “köhlən atlar”ın Kadiylə güclənməsi hamı üçün sürpriz oldu.

Heyətlə bağlı problemi olmayan “Sumqayıt”da elə də ciddi dəyişiklik olmadı. Bununla da “kimyaçılar”ın konkret iddiasının olmaması və ortabablar sırasında qərarlaşmağın komandanı qane etdiyi bilindi. Hərəyə 4 legionerlə anlaşan “Turan Tovuz” və “Şamaxı” ən çox əcnəbi futbolçu ilə güclənən komandalar sırasındadı. Görünür, çoxunun ciddi dəyişikliklərə imza atacağını gözlədiyi “Neftçi” səbirli olmağı seçdi. Yalnız Lebonla Tamaşı yola salan “ağ-qaralar” üç legioner, bir yerli futbolçuyla anlaşdı.

Ümumiyyətlə, bir-iki komanda istisna olmaqla, heyətlərdə ciddi dəyişikliklərə rast gəlmədik. Böyük ehtimalla, turnir cədvəlində formalaşan durum, dəqiq desək, kimin güclü, kimin zəif olmasının bariz görünməsi, aradakı uçurum hər kəsi heyətlə bağlı planlarını növbəti mövsüm üçün qurmağa vadar etdi.

Təbii ki, yay “transfer pəncərəsi” daha maraqlı olacaq!

KƏNAN BAHADIR