MHL-də son üç gündə keçirilən oyunlarla bağlı bəzi maraqlı məqamlar var.

“Vaşinqton”un forvardı Aleksandr Oveçkin “Vinnipeq”lə oyunda daha bir qol vurmaqla Ueyn Qretskinin rekorduna (894) doğru bir addım da atdı. 39 yaşlı rusiyalı ulduz MHL-də keçirdiyi 1462-ci oyunda 877-ci qolunu vurdu. İndi onu əfsanəvi kanadalıdan yalnız 17 qol ayırır. Yeri gəlmişkən, Qretskinin 894 qolu 1487 oyunda vurduğunu da xatırladaq.

“Pittsburq”un kapitanı Sidni Krosbi “Neşvill” ilə oyunda həm qol vurdu, həm də məhsuldar ötürmə verdi. Kanadalı əfsanə ən azı 40 məhsuldar ötürmə verdiyi mövsümlərin sayını 16-ya çatdırdı. O, bu göstəricidə MHL tarixində 5-ci pilləyə yüksəldi. Marsel Dionn və Niklas Lidstryom da 16 belə mövsüm keçirib. Krosbi yalnız Ueyn Qretski (19), Ron Frensis (19), Qordi Hou (18) və Rey Burkdan (17) geri qalır.

Daha bir maraqlı xəbər “Ottava” və “Kalqari” azarkeşlərinin ABŞ himnini fitə basmasıdı. Belə jestə azarkeşlər “Ottava” – “Minnesota” və “Kalqari” – “Detroyt” oyunlarında əl atıblar. Təbii ki, səbəb hər kəsə aydındı. Yanvarın 20-də ABŞ prezidenti kürsüsünə əyləşən Donald Tramp Kanadadan idxal olunan enerji məhsullarına 10, digər mallara isə 25 faiz tarif tətbiq edən sərəncam imzalayıb. Tramp Kanadanı ABŞ-nin 51-ci ştatı kimi görmək istəyini də gizlətmir.

Sonda baş məşqçilərlə bağlı bir xəbərimiz də var. “Florida”nın çalışdırıcısı Pol Moris “Çikaqo” ilə oyunda MHL-dəki 900-cü qələbəsini qazandı. O, 900 qələbə həddinə çatan 4-cü baş məşqçidi. Əvvəllər Barri Trots (914), Coel Kennevill (969) və Skotti Boumen (1244) də bu zirvəni fəth edib. Moris bu qələbələrin 384-nü “Karolona”, 315-ni “Vinnipeq”, 125-ni “Florida”, 76-nı isə “Toronto” ilə qazanıb.

1 fevral
Baffalo – Neşvill 4:3 (2:2, 1:1, 1:0)
Dallas – Vankuver 5:3 (1:0, 1:1, 3:2)
Kolorado – Sent-Luis 5:0 (4:0, 0:0, 1:0)
Yuta – Kolambus 2:3 ОТ (0:0, 1:0, 1:2, 0:1)
Florida – Çikaqo 5:1 (2:1, 1:0, 2:0)
Boston – Reyncers 6:3 (2:1, 2:0, 2:2)

2 fevral
Karolina – Los-Anceles 2:4 (1:1, 0:2, 1:1)
Edmonton – Toronto 3:4 (0:3, 1:0, 2:1)
Ottava – Minnesota 6:0 (1:0, 2:0, 3:0)
Pittsburq – Neşvill 3:0 (1:0, 1:0, 1:0)
Tampa-Bey – Aylenders 2:3 ОТ (0:0, 1:1, 1:1, 0:1)
Vaşinqton – Vinnipeq 4:5 ОТ (0:2, 2:1, 2:1, 0:1)
Kalqari – Detroyt 1:3 (0:2, 0:0, 1:1)
Baffalo – Nyu-Cersi 4:3 (3:0, 1:1, 0:2)
Kolorado – Filadelfiya 2:0 (0:0, 2:0, 0:0)

3 fevral
Anahaym – Monreal 3:2 (0:2, 2:0, 1:0)
Dallas – Kolambus 5:3 (1:1, 2:2, 2:0)
Florida – Aylenders 6:3 (2:0, 2:3, 2:0)
Reyncers – Veqas 4:2 (0:1, 1:1, 3:0)
Yuta – Sent-Luis 1:2 (0:1, 0:0, 1:1)
Vankuver – Detroyt 2:3 ОТ (1:1, 0:1, 1:0, 0:1)
Sietl – Kalqari 2:3 (0:3, 1:0, 1:0)