"Qarabağ" ölkə kubokunun 1/4 final mərhələsinin ilk oyununda "Səbail"in meydanından qalib ayrıldı - 1:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. İstəkliydilər. Çox yaxşı komandaya qalib gəldik. Rəqib ikinci hissədə əvəzetmələr sayəsində matçın sürətini daha da artırdı. "Səbail" meydanda həm topla, həm də topsuz çox düzgün davranır. Bu gün topa sahib olmaq bizim üçün asan deyildi. Həm süni örtük amili, həm də hava şəraiti buna mane olurdu. İlk oyunumuzu keçirdik. Ola bilər ki, cavab oyunu daha gərgin keçsin. Havanın soyuq olmasına baxmayaraq, həm bizim, həm də rəqibin azarkeşləri sona qədər komandaları dəstəklədi. Hər birinə təşəkkür edirəm.

- Kadi Borgesin transferi məcburiyyətdən atılan addımdı, yoxsa başqa seçim imkanınız var idi?
- Sadəcə, əlimizə düşən şansdan istifadə etdik. Son gün ərzində danışıqlar aparıldı. Bundan əvvəl Romaoya təklif gəlmişdi. Onun danışıq prosesi əsnasında bu variant irəli sürüldü və razılaşdıq. Kadi komandamız üçün vacib futbolçudu. Onun "Qarabağ"da olması hamı üçün xoşdu. Kadini sevirlər.

- Kadinin gəlişinə daha çox sevinirsiz, yoxsa Romaonun gedişinə daha çox üzülürsüz?
- İllərlə bir yerdə çalışdığımız, uğurlar qazandığımız, gərgin günlər keçirdiyimiz hər futbolçunun ayrılığına üzülürəm. İnsan ətrafına, dostlarına, iş yoldaşlarına uyğunlaşanda ayrılıq asan olmur. İstərdim ki, Romao da komandada qalsın. Amma son vaxtlar onunla bağlı xeyli təkliflər və danışıqlar olmuşdu. Belədə futbolçunu saxlamaqda çətinlik çəkirsən. Hər halda, sonda “yox” deyə bilmədik. Bəlkə də Kadi variantı olmasaydı, Romaonu buraxmayacaqdıq. Təbii ki, Kadinin gəlişinə sevinir, Romaonun gedişinə üzülürəm.

- Başqa futbolçuların da transfer edilməsi nəzərdə tutulub, yoxsa Kadi ilə kifayətlənəcəksiz?
- Yay üçün planlar var. Qışda isə transfer etmək çətindi. Kadinin transferi də son günlərdə alındı. Düzü, onun komandaya gəlişi düşünmədiyimiz transfer oldu. Bu variant birdən-birə ortaya çıxdı. Ola bilər ki, qarşıdakı müddətdə yenə hansısa variantlar üzə çıxsın. Transferlər etməyi düşünürük.

- Kadi "Qarabağ"dan ayrılana qədər hücumun sağ cinahında oynayırdı. İndi həmin mövqe üçün Kaşuk da var. Bəlkə bu barədə danışmaq tezdi. Yenə də kim ehtiyata düşəcək? Və ya futbolçuların mövqelərini dəyişməyi düşünürsüzmü?
- Kadi müxtəlif mövqelərdə oynaya bilən futbolçudu. Hazırlıq prosesini başa vurandan sonra hansı qabiliyyətlərinin yaxşı səviyyədə olduğuna baxıb qərar verəcəyik. Təki komandamda sağlam futbolçular olsun, biz isə kimi ehtiyatda saxlamağı, kimi hansı mövqedə oynatmağı düşünək. Özünüz görürsüz ki, daim həm zədəli, həm də yorğun futbolçularımız olur. Keyfiyyətli oyunçuların çoxluğu bizim üçün çox vacibdi.

- Mediada və sosial şəbəkələrdə eyni futbolçuların xidmətinə dəfələrlə müraciət etdiyinizə görə qınanırsız. Yəqin ki, bundan xəbərdarsız. Bu tendensiya nədən irəli gəlir? Həmin futbolçulara inamınızdan, yoxsa nədən?
- Qınanılmağımla bağlı şərh vermək istəmirəm. Hər insan fikir bildirməkdə azaddı. Gedənlərin qayıtmasına gəlincə, indiyə qədər yolları ayırdığımız oyunçuların 80, bəlkə də 90 faizinin getməsini istəməmişəm. Nə Kadinin, nə Romaonun, nə Juninyonun, həmçinin başqalarının... Sadəcə, bəzən transferlə bağlı danışıqlar elə həddə çatır ki, futbolçunun nə komandaya, nə mənə, nə də özünə faydası olur. Buna görə bəzən belə addımlar atırıq, oyunçuların qarşısını kəsmirik. Təbii ki, ən yaxşı təklifi dəyərləndirməyə çalışırıq. Qayıtmaları da inamımızla bağlıdı. Onsuz da biz həmin futbolçulara güvənirik. Bu üzdən başqa oyunçu tapa bilməyəndə bu futbolçuları komandaya qaytarmaq daha asan olur. Onları yenidən öz kollektivimizə uyğunlaşdırırıq. Bəlkə də dünya təcrübəsinə belə hallara az rast gəlinir. Lakin bizim kimi kiçik futbol ölkələrində bəzən bu yola əl atmağa məcbur oluruq.

- İcraiyyə Komitəsinin iclaslarında darıxmırsız ki?
- Yox, niyə ki?! Çox fəal müzakirələr aparılır.

- İcraiyyə Komitəsinin sonuncu iclasında növbəti mövsümdən premyer-liqadakı komandaların sayı artırıldı. Sizcə, bu qərar premyer-liqaya hansı yenilikləri gətirəcək?
- Bu onsuz da yenilikdi. Daha iki klubun premyer-liqada olması müsbət haldı. Yeni komandaların təmsil etdiyi bölgələrdə futbola həvəs, sevgi daha da artacaq. Bəlkə yeni, bacarıqlı, keyfiyyətli futbolçular üzə çıxacaq. Yeni kadrlar kəşf olunacaq. Sponsorlar olacaq. Həmçinin oyunçuların sayı artacaq. Keyfiyyət barədə dəqiq nəsə deyə bilmərəm. Amma gələcək üçün faydalı addımdı. Daha çox komandanın olmamasındansa olması yaxşıdı.

- Mövsümün sonunda premyer-liqanı sonuncu pillədə bitirən komandanın 1-ci liqaya düşməsi, 1-ci liqadan isə ilk "üçlük"dəki kollektivlərin premyer-liqaya yüksəlməsi daha ədalətli qərar deyilmi?
- 1-ci liqadan premyer-liqaya birdən-birə üç komandanın gəlişinin nə ilə nəticələnəcəyini bilmirəm. Onsuz da illər ərzində premyer-liqadan hansısa komanda 1-ci liqaya düşməyib.

- 12 komandanın 4 dövrədə oynaması 44 matç deməkdi. Çox deyilmi?
- İclasda oyunların 4 dövrə ərzində keçirilməsi müzakirə olunmadı. Bir neçə variant var. Minimum 33-35 tur olacaq.

KƏNAN BAHADIR