“Elə komanda ola bilər ki, start heyətində 11 yerli futbolçuya yer versin” – doğrudan?
AFFA İcraiyyə Komitəsinin dünən keçirilən iclasında Misli premyer-liqasında 2025/26 “futbol ili”ndən legioner limitinin ləğvi qərara alındı.
Düzdü, son bir neçə həftədə bu məsələ ətrafında müxtəlif fikirlər səsləndirilir, həm həmkarlarımız, həm də futbol mütəxəssisləri mövqeyini ifadə edirdi. Lakin AFFA-da oturanlar bu qərarı verməklə həm də mövqeyini dəyişdi. Ona görə ki, İcraiyyə Komitəsinin 2024-cü ilin mayında keçirilən iclasında premyer-liqanın 2025/26 mövsümüylə bağlı konkret qərar verilmişdi: “legioner limiti 8+3 olacaq”.
İndi futbol ictimaiyyətinin bəzi simaları üst-üstə düşməyən, bir-birinə zidd olan qərarı qınayır, AFFA-nı sözünü çeynəməklə suçlayır.
“Football-plus.az” bununla bağlı İcraiyyə Komitəsinin üzvü Səməd Qurbanovun fikirlərini öyrəndi:
“Məncə, bu qərarın futbolumuza hansısa ziyanı yoxdu. Düşünürəm ki, belədə yerli futbolçular arasında rəqabət daha güclü olacaq. Həmişə bu qərarı dəstəkləmişəm. Bizim uşaqlar özlərini elə aparmalı, elə oynamalıdılar ki, hansısa legioner onun mövqeyini tuta bilməsin. Qərar oyunçularımıza motivasiya verəcək. Premyer-liqada elə komanda ola bilər ki, start heyətində 11 yerli futbolçuya yer versin. Biz belə halları istisna etmirik. Hər şey bizim uşaqlardan asılıdı. Futbolçunun həvəsi, bacarığı varsa, limit olsa da, olmasa da, şans qazana biləcək”.
KƏNAN BAHADIR
Digər xəbərlər
