"Araz-Naxçıvan" Misli premyer-liqasının səfərdə keçirilən 21-ci tur matçında "Sumqayıt"la heç-heçə etdi - 0:0.

"Football-plus.az" xəbər verir ki, Muxtar Respublika təmsilçisinin baş məşqçisi Elmar Baxşıyev oyunsonrası mətbuat konfransında jurnalistlərin suallarını cavabladı.

- İki fərqli hissə izlədik. Birinci yarıda istədiyimiz oyunu göstərə bilmədik. Dəyişikliklərdən sonra hadisələrin axarına nəzarət etməyə başladıq. Ağır səfər oyunu keçirdik. Məncə, bir xala da sevinmək lazımdı. Uduza da, qələbə qazana da bilərdik. Yola davam edirik. Növbəti matça hazırlaşırıq.

- Rəqibin planlarınızı pozduğunu düşünürsüzmü?
- "Sumqayıt" Vaqif Cavadovun gəlişindən sonra daha dinamik və aqressiv oyun sərgiləyir. Təhlükəli komandadı. Üstün cəhətləri haqda futbolçularımıza məlumat vermişdik. Yaxşı iş görürlər.

- Samir Abasov deyib ki, "Qarabağ"dan başqa heç bir kollektiv dominant futbol oynaya bilmir. Siz necə düşünürsüz?
- Dominant futbol üçün illərlə çalışmaq lazımdı. Kimsə "Araz-Naxçıvan"ın müdafiə futbolu oynadığını, xoşbəxtliyi əks-hücumlarda axtardığını deyirsə, yanılır. Oyunçulardan hücumda fəal olmağı tələb edirik. Təbii ki, burda büdcə və keyfiyyətli oyunçuların çoxluğu da vacib rol oynayır. Yoxsa yaradıcı ola bilməzsən.

- Qış fasiləsindən sonra ikinci dəfədi ki, meydana təzyiq altında çıxırsız. "Zirə"ylə oyunda da belə hiss edildi. Bu nədən irəli gəlir?
- Belə məqamlarda rəqibi də vurğulamaq lazımdı. Bəzi komandalar bizi özümüzdən çıxarmağa çalışır. İdman stressdən ibarətdi. Sizə normal cavab verim. Oyunçularımıza sarı vərəqə göstərilir. Bəs, rəqib? Bax bu məsələlər bizdə qıcıq yaradır. 80-ci dəqiqədə "Sumqayıt"ın qapısı qarşısında yaşananlara görə penalti təyin edilməliydi. Bundan heç kim danışmır. Epizodu incələmişik. Dəqiq penaltidi. Amma nə VAR-a baxan var, nə də VAR-a baxmağa çağıran... Möhkəm komandayıq. Bizi bu yolla əzmək istəyirlərsə, bu onlarda istək olaraq qalacaq. Onlar üçün üzülürəm... Bizə qarşı diqqətli olmalıdılar.

- Görünür, iki cəbhədə mübarizə aparırsız: meydanda və meydandan kənarda...
- Məşqçilər korpusunun və futbolçuların işi meydançadadı. Qalan məsələlər bizə aid deyil. Komandama inanıram. Oyunçularım hər baxımdan sağlamdı. Məqsədimizdən vaz keçməyəcəyik.

- Qış fasiləsindən sonra üç fərqli nəticə əldə etmisiz. Qeyri-sabitlik davam edəcək?
- Siz bizi nəticə olaraq qeyri-sabit komanda kimi qələmə vermək istəyirsiz. Məni maraqlandıran oyunun keyfiyyətidi. Komandam tapşırıqları meydanda yerinə yetirir. Bəzən istədiyim olur, bəzən də yox. Bu matçda 5-6 yüzfaizlik qol epizodunu dəyərləndirə bilmədik. Bu üzdən nə siz məni, nə də mən komandamı günahlandıra bilərəm. Futbolun yazılmamış qanunları var. Belə hallarla barışmaq lazımdı.

- Bugünkü nəticəni ədalətli hesab edirsiz?
- Yenə deyirəm, bir xala görə də sevinməliyik. Bizim üçün hər xal dəyərlidi. Nəticəni çox düşünmək istəmirik. İndi əsas hədəfimiz növbəti oyunlara köklənməkdi.

KƏNAN BAHADIR