Bu günlərdə İspaniyadan futbola ləkə vuracaq xəbərlər gəlməkdədi.

Belə ki, ''Sevilya''nın üzvü Kike Salas çərşənbə axşamı İspaniya polisi tərəfindən saxlanılıb. ''Football-plus.az'' xəbər verir ki, bir neçə saat ifadə verdikdən sonra o, bazaya qayıdaraq komanda ilə birlikdə məşqə çıxıb. Məlum olub ki, 22 yaşlı müdafiəçi bilərəkdən sarı vərəqə almaqda və bunun sayəsində yaxın insanlarına pul qazandırmaqda günahlandırılır!

''El Konfidensial'' nəşrinin iddiasına görə iş məhkəməyə qədər uzanacaq. La Liqa rəhbərliyi də məsələni diqqət mərkəzində saxlamaq və məhkəmə prosesində iştirak etmək niyyətindədi. Artıq Kike Salasın ətrafındakı insanlardan iki nəfər də məsələyə cəlb olunub və onların da ifadəsi alınıb. Amma bu məsələyə daha çox insanın qarışdığı güman olunur. Salas öz yaxınlarına konkret bir oyunda sarı vərəqə alacağını əvvəlcədən deyirmiş və onlar da buna pul qoyuluşu edirlərmiş. Bu məsələnin araşdırılmasını Beynəlxalq Polis Təşkilatının qeyri-qanuni mərclər mövzusunda təcrübəsi olan peşəkarları üzərlərinə götürüblər. Araşdırma nəticəsində məlum olub ki, Salas öz ''fəaliyyətini'' ötən mövsümün ikinci dövrəsində həyata keçirib. Həmin vaxt ''Sevilya'' artıq heç bir ciddi hədəflər uğrunda mübarizə aparmırdı. 30-38-ci turlar arasında Salas bir çoxu son dəqiqələrdə olmaqla 7 sarı vərəqə alıbmış! Həmin müddətdə La Liqada ondan çox cəzalanan alan futbolçu olmadı. Vərəqə limitini doldurduğu üçün o, bir oyunu cəza üzündən qaçırmalı da oldu.

İddialara görə həmin aylarda Salasın dostları və yaxınları vərəqələrlə bağlı 30-a yaxın pul qoyuluşu edərək ümumilikdə 10 min avrodan çox qazanc əldə ediblər. Polislər hazırda daha ciddi dəlillər axtarırlar. ''Sevilya''nın öz yetirməsi olan bu futbolçu 2021-ci ildən əsas komandaya cəlb olunmağa başlayıb. İndiyə qədər o yalnız 2022/23-ün ikinci dövrəsini icarə əsasında ''Tenerife''də keçirib. Maraq üçün Salasın bu mövsüm La Liqada 14 oyun keçirdiyini və 3 sarı vərəqə aldığını bildirək.

ƏLİ