Mahir sözü Azərbaycan dilində məharətli, bacarıqlı, qabiliyyətli, işini əla bilən, usta mənalarını ifadə edir.

Sirr deyil ki, futbolumuzun göz bəbəyi sayılan Mahir Emreli də həm ölkəmizə, həm də bu ada layiq olmaq üçün əlindən gələni əsirgəmir. Şəxsən mən buna sidqi-ürəkdən inanıram və tək olmadığımı düşünürəm.

Məlum olduğu kimi, son vaxtlar baş verən hadisələr də onun xeyrinə işlədi. Daha doğrusu, Bəxtiyar Həsənalızadə, Musa Qurbanlı, Cəlal Hüseynov, Ramil Şeydayev kimi ünlü, əksəriyyətinin legioner həyatında uğurlu olacağına inandığı futbolçuların müxtəlif səbəblərdən əli ətəyindən uzun Misli premyer-liqasına qayıtması azərbaycanlı futbolsevərlərin Mahirə sevgisini, hörmətini birəbeş artırdı. Ona görə ki, 2021-ci ilin yayında “Qarabağ”dan ayrılan oyunçu “Legiya”, Zaqreb “Dinamo”su və “Konyaspor”un formasını geyəndən sonra Azərbaycan klublarından “yağlı” təkliflər alsa da, ölkəmizi vətəndən kənarda təmsil etməyi üstün tutdu və “Nürnberq”in şərəfini qorumağa başladı. Düzdü, bu komanda elitada çıxış etmir. Lakin Almaniyanın 2-ci bundesliqasının səviyyəsini aşağılamaq heç cür mümkün deyil. Hər halda, premyer-liqanda stadionu, sponsoru, ciddi azarkeş dəstəyi, keyfiyyətli legionerləri olmayan klublar varsa, aşağı pillədə qərarlaşan komandalarla yuxarıdakılar arasında mövsümün birinci yarısında uçurum yaranırsa, buna cəsarət edə bilməzsən.

Qısası, Mahir yaşıl meydanlarda üzümüzü ağ edən, barmaqla sayılacaq qədər futbolçulardan biri və bəlkə də birincisidi. Di gəl ki, tez-tez ağlasığmaz, xoşagəlməz ifadələri, yersiz davranışıyla da gündəmə gəlir. Bu yerdə təxminən üç il əvvəl yaşanan olayı xatırlatmaqda fayda var. Xatırlayırsızsa, o vaxt “Legiya”da çıxış edən Emreli komanda yoldaşı Lukinyasla birgə azarkeşlərin hücumuna məruz qalmış, döyülmüşdü. Bəli-bəli, həmyerlimiz klub avtobusunda tərəfdarların yumruqlarını dadmışdı. Yerli media orqanları isə haqlı olaraq, həmin olayı “Mahir Emreli döyüldü” sərlövhəsiylə tirajlamışdı. Ardından “Motivator Azerbaijan” “yutub” kanalına qonaq olan futbolçu jurnalistlərin reytinq xatirinə qərəzli başlıqlar yazdığını, ona ağıl öyrətmək istədiklərini demişdi.

Maraqlıdı ki, o, indi də media nümayəndələrini hədəf alıb. Lakin bu dəfə azərbaycanlıları yox, Almaniyanın adlı-sanlı, dünyanın üçüncü, Avropanın ən böyük tirajla çap olunan qəzeti sayılan “Bild”i! Söhbət bazar və bayram günlərindən başqa gündəlik, özü də 1 milyon 500 mindən çox tirajla çap olunan, “bild.de” domeniylə hər gün milyonlarla oxucuya elektron xidmət göstərən qəzetdən gedir. Hələ “Bild”in 1952-ci ildən bəri fəaliyyətdə olduğunu demirik. Deməli, almaniyalı həmkarlarımızın 70 ildən çox tarixi olan qəzetinin zəngin adət-ənənələri, hörmətiylə yanaşı, əldə etdiyi güvən də var. Özü də “Müstəqil və tərəfsiz” şüarıyla çapdan çıxır. “De.statista.com” portalının məlumatına görə, “bild.de” saytının aylıq istifadəçi reytinqi 200 milyon civarındadı. Bəs Mahir nə edib? Qulaq asın...

Deməli, “İdman” TV-də qonaq olduğu “Sportcast” verilişində həmkarımızın “Almaniya mətbuatı baş məşqçi Miroslav Kloze ilə aranızın dəydiyini yazır. Xüsusilə də “Bild” nəşrinin məlumatına görə aranızda saatyarımlıq mübahisə olub. Bu, nə qədər doğrudu?” sualını belə cavablayıb:

Ay Mahir, əvvəla həmin xəbəri “Bild”lə yanaşı, yerli “Nürnberq” qəzeti də yayıb. Özü də “Bild”dən əvvəl. Hətta baş məşqçin Miroslav Kloze bu məsələylə bağlı açıqlama verib və məlumatı təkzib etməyib. Əksinə, söhbət etdiyinizi, nəticədə səni anlayışla qarşıladığını bildirib. Yuxarıda sənə olan güvəndən, sayğıdan bəhs etdik. Gözləntimiz qollar, məhsuldar ötürmələr, ümumiyyətlə, həm şəxsi, həm də iş həyatınla bağlı xoş xəbərlərdən başqa bir şey deyil. Hətta karyeranı azı bundesliqada davam etdirməyini arzulayırıq. Sabah demə ki, “Futbol+” yazıbsa, deməli, olmayıb...

KƏNAN BAHADIR