Bu gün "Qarabağ" və "Kəpəz" qış təlim-məşq toplanışı çərçivəsində yoxlama oyunu keçiriblər.

“Football-plus.az” xəbər verir ki, "Azərsun Arena"dakı qarşılaşma ağdamlıların 5:1 hesablı qələbəsi ilə bitib. Oyundan sonra “Qarabağ”ın baş məşqçisi Qurban Qurbanov jurnalistlər qarşısına çıxıb.

- İstədik ki, rəsmi oyunda futbolçular özlərini hiss etsinlər. Hər futbolçuya 45 dəqiqə şərait yaratdıq. Hətta tapşırıq vermişdik ki, tələsməsinlər və ehtiyalı olsunlar. Çünki yanvarın 17-də çempionat başlayır. İndi futbolçuları yüksək dinamika ilə oyunlara hazırlamaq böyük riskdi. Məncə, futbolçular üçün faydalı bir oyun oldu. “Kəpəz” rəhbərliyinə və Azər Bağırova təşəkkür edirəm ki, təklifimizi qəbul etdilər. Ayın 12-də “Zirə” ilə oyun da var. Komandanı normal səviyyəyə gətirməyə çalışacağıq.

- Zədəlilərin durumu necədi?
- Bədavi hələ komandaya qoşulmayıb. Bəhlulla Veşoviçin oynaması üçün 20-25 dəqiqə şərait yaratdıq. Zubirin hərarəti var idi. Başqaları da tam bərpa olunur. Aleksey İsayevə də tapşırılmışdı ki, ehtiyatlı olsun. Ayın sonunda hər şey qaydasında olacaq.

- Benzya ilə bağlı durum nə yerdədi?
- Benzyanın anasının vəziyyəti ağırdı. Ona görə də hələ dönməyib. Bir dəfə xəbər göndərdi və biz də razılaşdıq.

- Akademiyanın oyunçuları bu gün özlərini göstərdilər. Onlarla bağlı nə deyə bilərsiz?
- Bir neçə oyunçu bizimlə məşqlərdə iştirak edir. Amma hələ daha çox çalışmalıdılar. İstəkli və çalışqandılar. Daha diqqətli olmalıdılar.

- Juninyonun transferi ilə bağlı məsələ nə yerdədi?
- Düzü, məsələ konkretləşməyib. Klubla bağlı bəzi nüanslar var. Oyunçunun öz istəyi də vacibdi. Əvvəl “Sevilya” ilə hər şey tam danışılmışdı. Həm menecerlə, həm də klub rəhbərlikləri ilə danışıqlar gedir. Yaxın günlərdə bilinəcək.

- Hansısa transfer gözlənilirmi?
- İşimizin çox hissəsini oyunçularla bağlı ayırmışıq. Amma alınması tam real görünmür. Yenə də vaxtımız var.

- Avrokuboklarda çətin oyunlar var. Juninyonun gedib-getməməsinin həmin oyunlara bir təsiri olacaqmı? Həmin oyunlar sizi gözləsə də, Juninyoya yaxşı təklif olsa, buraxacaqsız?
- Təklif var. Bəzən futbolçuları və təklif göndərən klubu nəzərə almaq lazımdı. Ümumən həm “Sevilya”dan, həm də “Flamenqo”dan təkliflərin gəlməsi “Qarabağ”ın böyüməsi və bu kluba daha çox diqqət ayrılması deməkdi. Son 7-10 gündə İspaniya mətbuatı bizim ölkənin futbolundan danışdı. Böyük müzakirələr gedib. Biz oyunçunu itirə bilərik. Amma klub bu transferlə böyük uğur əldə edəcək. Siyasi tərəfdən baxsaq, ölkə futbolu üçün böyük bir addımdı.

- Nəzərə alaq ki, Cica zəifləyib və Juninyo da gedə bilər. Avrokuboklardakı qarşıdakı iki oyunu necə dəyərləndirirsiz?
- Variantlarımız var. Dəfələrlə belə hallar olub. Biz çıxış yolu tapmışıq. Hazırda o mövqedə oynayan futbolçular var.

- Juninyonun “Sevilya”nın təklifindən imtina etdiyi deyilir. Sizin üçün futbolçunuzun “Flamenqo”ya cavab verməsi nə dərəcədə önəmlidi?
- Futbolçunun istəyi çox önəmlidi. “Sevilya” bizim üçün daha maraqlı olardı. Çünki Avropanın köklü klubudu. Ronaldinyo kimi futbolçu “Flamenqo”dan çıxıb. O klubun da böyük iş prinsipləri var. Bizim üçün bir o qədər fərqi yoxdu. Əsas oyunçunun ürəyincə və klubdakı perspektivi daha yaxşı olsun.

RÖYANƏ OĞUZ