“Qalib gələ bilmirsənsə, bəzən artıq uduzmamağın qayğısına qalmalısan” - “Barselona”ya nə olub?
Mövsümə parlaq nəticələrlə başlayan “Barselona” qış fasiləsi ərəfəsində ciddi böhranla üzləşdi.
Bütün turnirlər çərçivəsində keçirdiyi son 10 oyunun yalnız 4-də qalib gələn, bir o qədərində uduzan, 2 dəfə heç-heçə edən komandanın nəticələrinə böhrandan başqa ad qoymaq olmaz.
Futbolçular nə düşünür?
“Atletiko” ilə oyunda həm qol imkanlarını qaçıran, həm də rəqibin 2-ci qolunda hücumun qarşısını ala bilməyən Rafinya məsuliyyəti öz boynuna götürüb. Braziliyalı vinger başqa maraqlı fikirlər də söyləyib:
“Barselona”da oynayırsansa, hər şeyi qazanmağı düşünməlisən. Belə düşünmürsənsə, deməli, öz komandanı tapmamısan. Belə nəticələrin günahkarı özümüzük. Pis oynayırıq. Səviyyəmiz aşağı düşüb. Yəqin müəyyən məqamlarda konsentrasiyamız çatmır və bu bizə baha başa gəlir. Yorğunluq da özünü göstərir. Bəzi matçlarda yorğun olmadığımızı desəm, yalan danışaram. Bu əsas amildi, ancaq səviyyəmiz də aşağı düşüb”.
Ter Ştegen zədələnəndən sonra tələm-tələsik transfer olunan polşalı qapıçı Voytsex Şensnı hələ də meydana çıxa bilməməsinə görə narahat deyil:
“Lap əvvəldən demişəm ki, mənə forma yığmaq lazımdı. Hazırda özümü həm fiziki, həm də mental baxımdan meydana çıxmağa tam hazır sayıram. Onu da gizlətmirəm ki, “Barsa”nın məşqçisinin yerində olsaydım, özümə oyun vaxtı verməzdim. Tam anladığım vəziyyətə görə məyus deyiləm. Penya məşqçinin etimadını tam doğruldur və yüksək səviyyədə oynayır. Artıq təqaüdə çıxan futbolçu kimi belə vəziyyətə bir qədər fərqli yanaşıram. Mənə elə gəlir ki, olaylara daha obyektiv qiymətləndirə və eqoizmdən uzaq ola bilərəm. Qətiyyən məyus deyiləm”.
Təbii ki, Şensnı son vaxtlardakı qeyri-sabit oyuna da toxunub:
“Təcrübəsizliyin və gəncliyin təbii nəticəsidi. Vaxtilə özüm də belə olmuşam. Çempionlar Liqasında böyük stadionlarda keçirilən oyunlardan çempionatdakı kiçik komandalarla oyunlara keçmək çox çətindi. Hər gənc futbolçunun keçməli olduğu yoldu. Hər oyuna eyni şəkildə yanaşmaq lazımdı, ancaq bu elə də asan deyil”.
“Barsa”nın qeyri-sabit nəticələrindən söz düşəndə ağla gələn şəxslərdən biri də Robert Levandovskidi. Axı komandanın oyunu xeyli dərəcədə ondan asılıdı. Düzdü, klub rəhbərliyi və baş məşqçi hələ də 36 yaşlı hücumçuya inamını itirməyib, hətta onunla müqailənin müddətinin daha birilliyə uzadılması variantı var. Bununla belə, Levanın oyununda effekt azalıb. Yaxın vaxtlarda bu yöndə dəyişiklik olmasa, futbolçunun gələcəyi ilə bağlı fikir ayrılığı yarana bilər.
Yeri gəlmişkən, polşalı “Atletiko”ya məğlubiyyətdən sonra maraqlı açıqlama verib:
“Atletiko” ilə oyunun sonunda elə oynayırdıq ki, sanki bu finaldı, uduzuruq və necə olur-olsun, hesabı bərabərləşdirməliyik. Qalib gələ bilmirsənsə, bəzən artıq uduzmamağın qayğısına qalmalısan. Cari mövsümdə bir neçə dəfə belə halla üzləşmişik”.
“Barsa”nın sabiq müdafiəçisi, 616 oyun keçirmiş Jerar Pike isə indiki böhranı birmənalı şəkildə maliyyə problemi ilə bağlayır:
“Barsa”nın maliyyə problemi var, bu üzdən gəncləri erkən mübarizəyə qoşurlar. Artıq neçə ildi zibildəyik, ancaq bu vəziyyətdən çıxacağıq”.
Rəhbərlik Flikə güvənir
Komandanın son oyunlarda uğursuzluqla üzləşməsinə baxmayaraq, hələ də rəhbərliyin baş məşqçi Hans-Diter Flik etimadı tamdı. Bunu iddia edən “sport.es” saytı yazır ki, rəhbərik yanvarda vəziyyətin düzələcəyinə inanır, ona görə ki, Flikin yetirmələri yetərincə yüksək səviyyəli oyun göstərir. Rəhbərlik hesab edir ki, alman mütəxəssis komanda oyununu yaxşılaşırıb, həmçinin bəzu futbolçuların fərdi tərəqqisinə təsir göstərib.
Digər xəbərlər
