Türkiyə kubokunda mübarizə davam edir.

4-cü mərhələyə yekun vuruldu vƏ 5-ci mərhələnin püşkü atıldı. Nəhənglər hələ ki mübarizəyə qoşulmayıb. 38 komandanın iştirak etdiyi 5-ci mərhələyə dekabrın 17-19-da yekun vurulacaq. Daha sonra qrup mərhələsi başlayacaq və superliqanı ötən mövsüm ilk “5-lik”də tamamlayan klublar da mübarizəyə qoşulacaq. Hər birində 6 komanda olmaqla 4 qrup müəyyənləşdiriləcək. İlk iki yeri tutanlar 1/4 finala vəsiqə qazanacaq.

İndi maraq doğuran başqa bir məqam var. Türkiyə mətbuatında yayılan iddialara görə, “Fənərbaxça” və “Kasımpaşa” bu mövsüm ölkə kubokunda iştirak etmək istəmir! Hətta hər iki klubun bununla bağlı Türkiyə Futbol Federasiyasın məktub göndərdiyi də məlum olub. Federasiyadan hələ ki onların müraciətinə cavab verilməyib. Bu klubların kubokdan imtina etmək istəməsinin başlıca səbəbi isə bu turnirdəki gəlirlərin çox cüzi olmasıdı. Əslində bu məsələ uzun illərdi tez-tez gündəmə gətirilir. Türkiyə kubokunda hər qələbə və mərhələnin adlanılması üçün verilən pul mükafatı klubların xərclərini qarşılamır! Bu xərclərə hər oyun üçün futbolçulara ödənilən məbləğ, eləcə də səfərə yollanmaq üçün sərf olunan pul daxildi. Əvvəlki illərdə də klublar bu məsələni tez-tez gündəmə gətirsə də, TFF bu problemə bir çarə tapa və turnirin mükafat fondunu artıra bilmir. Püşkatma mərasimində “Fənərbaxça” ilə “Kasımpaşa”dan heç bir nümayəndənin olmaması da onların niyyətinin ciddiliyindən xəbər verir.

Düzdü, “Fənər” mübarizəyə yalnız qrup mərhələsindən qoşulacaq. Amma “Kasımpaşa” 5-ci mərhələdə 1-ci liqa təmsilçisi “Gənclərbirliyi”nə rəqib olub. Yəni bu klubdan bir nümayəndə püşkatmada iştirak etməliydi. Ötən mövsüm “Fənər”, bilindiyi kimi, federasiyaya etiraz əlaməti kimi superkubokda “Qalatasaray”la oyuna gənclərdən ibarət komanda ilə çıxmış və 1-ci dəqiqədən sonra meydandan çəkilmişdi. Hələ həmin vaxt “Fənər”in 2024/25-də ölkə kubokunda iştirak etməyəcəyi haqda şayiələr yayılmışdı. Amma bəzi mənbələr iddia edir ki, həm “Fənər”, həm də “Kasımpaşa” gənclərdən ibarət komandanı meydana çıxarmaqla turnirdə iştirakını davam etdirə bilər.