"Araz-Naxçıvan" Misli premyer-liqasının 16-cı tur matçında "Səbail"in meydanından qalib ayrıldı - 2:0.

"Football-plus.az" xəbər verir ki, "qırmızı-ağlar"ın baş məşqçisi Elmar Baxşıyev oyunsonrası mətbuat konfransında jurnalistlərin suallarını cavabladı.

- Bizi ağır oyun gözlədiyini bilirdik. Süni ot örtüyündə çıxış etdik. Bu üzdən, komandanı çətin mübarizəyə hazırlaşdırmışdıq. Matça istədiyimiz kimi başlamasaq da, getdikcə ümumi vəziyyətə öyrəşməyə çalışdıq. Komandamı təbrik edirəm. Potensialımız çoxdu. Ümid edirəm ki, növbəti oyunlarda daha məzmunlu çıxış edəcəyik.

- İkinci dövrənin son matçlarında "Sabah" və "Qarabağ"la qarşılaşacaqsız. Sizcə, fasiləyə daha uğurlu nəticələrlə yollanmaq mümkün olacaqmı?
- Komandanı oyundan-oyuna hazırlaşdırırıq. Fikrimizi hansısa rəqiblərə yox, ümumiyyətlə, çempionata yönləndirmişik. Üçüncü və dördüncü dövrəni də düşünməliyik. Qismətdə nə varsa, ona da sahib olacağıq.

- Futbolçuların əksəriyyəti yaşlıdı. Amma ardıcıl qələbələr qazanırsız. Uğurun sirri nədədi?
- Əvvəlki iş yerimdə Asiflə çalışırdım. Bilindiyi kimi, o da yaşlıdı. Amma gənclərlə eyni yükü bölüşürdü. Müasir futbolda cavan-yaşlı prinsipi yoxdu. Belə müqayisələr keçmişdə qalıb. Heyətimizdə təcrübəli futbolçular var. Onlar tələblərimizi yerinə yetirir. Belə məsələlər bizi çox sevindirir. Həftə ərzində birlikdə oluruq. Futbolçularım böyük işlər görür. Ona görə deyirəm ki, daha yaxşısını etmək üçün potensialımız var.

- Deməli, sizə təcrübəli futbolçularla çalışmaq daha rahatdı?
- Mən yerli və əcnəbi, cavan və yaşlı oyunçular arasında fərq qoymuram. Hamıyla işləməyə çalışırıq. Komanda etdiklərimizin qarşılığını verir.

- Bəs futbolçuların arxayınlaşmaması üçün hansı işlər görülür?
- Komandam nəticələrə acdı. Oyunlara ciddi və düzgün yanaşırlar. İstəkli və inamlı kollektiv formalaşıb. Kollektivin uğurlu seriya əldə etməsi təsadüfi deyil.

- "Qarabağ"la aranızda qəribə və qarşılıqlı oyun gedir. Siz liderliyə yüksəlirsiz, iki-üç saat və ya bir-iki gün sonra zirvəni "Qarabağ"a təhvil verirsiz. Sizcə, belə durumda psixoloji təzyiq altında siz daha çox qalırsız, yoxsa "Qarabağ"?
- Düşünürəm ki, "Qarabağ" həmin təzyiqin öhdəsindən çoxdan gəlib. Bu komanda illərin kollektividi. Sevindirici haldı ki, futbolçularım iddialıdı. Amma iş prinsipimiz sırf "Qarabağ"la mübarizə aparmaq deyil. Həm hücum planında, həm də daha yaxşısını etmək yönündə potensialımız var.

- "Sabah"da yaşanan baş məşqçi dəyişikliyindən sonra hansısa məqamlar diqqətinizi çəkibmi?
- "Sabah" da iddialı komandadı. Yuxarı pillələr uğrunda mübarizə aparırlar.

- Benni sanki oynamaq istəyirdi və meydanda olmadığına görə narazı görünürdü...
- Bütün futbolçularım oynamaq istəyir. Etiraz etmək normal haldı. Oyunçu istəkli olduğunu göstərməlidi.

- Biri var arzu, biri də var reallıq... Çempion olmaq sizin üçün arzudu, yoxsa reallıq?
- Elə sualdı ki, indidən cavab vermək mümkün deyil. İndiki durumda çempion olmağı düşünmürük. 2-ci dövrənin son iki matçına köklənəcəyik. Başqa məsələləri isə qışdan sonra düşünmək olar. Hər şeyi zaman göstərəcək.

- Qış planları bəllidimi? Fasilədə komanda nə dərəcədə güclənəcək?
- Ölkə daxilində olacağıq. Təlim-məşq toplanışını Bakıda keçirəcəyik. Transferlərə gəlincə, bu haqda rəhbərliklə müzakirələr aparacağıq.

KƏNAN BAHADIR