“Qarabağ”ın hücum xəttiylə bağlı problemlər aktuallığını qoruyur. Düzdü, “köhlən atlar”ın məhsuldarlıq baxımından çatışmazlığı yoxdu. Ona görə ki, Ağdam təmsilçisi premyer-liqada ən çox qol vuran komandadı – 36 qol! “Qarabağ”ın bu göstəricidə ən yaxın izləyicisi olan “Sabah” cəmi 24 dəfə fərqlənib. Deməli, problemlər başqa sahədə uğur qazanmağa mane olur. Daha doğrusu, avrokuboklarda.

Yarışa Avropa Liqasının əsas mərhələsində davam edən “Qarabağ” burda keçirdiyi 5 matçda 4 qol vurub. Məlum olduğu kimi, komanda yalnız “Bude/Qlimt”i məğlub edə bilib. Olavio Juninyonun yaşadığı böhrandan xəbərdarsız. Bu haqda ətraflı danışmışıq. Hətta o, “Lion”la matçda topu Elvin Cəfərquliyevin əlindən alıb penaltini özü yerinə yetirməsəydi, Avropa Liqasının yeni mövsümündə qol hesabını açmayacaqdı.

Emmanuel Addai istəklidi. Hiss olunur ki, özünü yaxşı tərəfdən göstərməyə, belə demək mümkünsə, Juninyonun taxt-tacını ələ keçirməyə çalışır. Bu baxımdan onun haqda müsbət fikirlər səsləndirmək olar. Musa Qurbanlı və Nəriman Axundzadə isə heç cür toparlana bilmir. Formada deyillər, təhlükəli vəziyyətlərdə baş rolda çıxış edə bilməmələri azmış kimi, məsuliyyəti çiyinlərinə götürməkdən çəkinirlər. Redon Cica, ümumiyyətlə “Qarabağ”ın Avropa Liqasındakı iştirak ərizəsində yer almayıb. Çox güman, qış fasiləsində komandadan ayrılacaq. Artıq Albaniya mətbuatı bu yöndə xəbərlər tirajlamağa başlayıb.

Göründüyü kimi, hadisələrin axarı “Qarabağ”ı hərəkətə keçməyə məcbur etməlidi. Juninyonun mövsümün sonunda komandanı tərk edəcəyi istisna olunmur. “Köhlən atlar” qış fasiləsində mütləq daha üst səviyyədə hücumçu(lar) ilə güclənməlidi. Yoxsa yalnız “Bayer-04” və “Braqa” kimi komandalara qarşı göstərilən möhtəşəm oyunlardan təəssüratı ilə ovunmaqdan başqa çarəmiz qalmayacaq!

KƏNAN BAHADIR