“Qəbələdə Estoniya millisi ilə oyunumuzu çoxları gördü. Oyunla bağlı qəti fikir söyləmək çətindi. Matça zəif başladıq. Görüşün əvvəlində qol buraxmamağımız yaxşıdı. Evdə oynayanda daha aqressiv olmalıyıq. İnanın ki, biz qol vursaydıq, rəqibin heç bir şansı olmayacaqdı. Birinci hissənin bitməsinə təxminən 10 dəqiqə qalmış oyuna nəzarəti ələ aldıq. İkinci hissə bizim diqtəmiz altında keçdi. Və təbii ki, qol vurmalıydıq. Gördüyüm o oldu ki, biz fərdi baxımdan rəqibdən güclü idik. Evdə Estoniyaya qalib gələ bilməyəndən sonra səfərdən qələbə ilə qayıdacağımızı düşünmək sadəlövhlük olardı. İsveç artıq 1-ci yeri təmin edib, bu oyun rəqib üçün elə də vacib deyil. İsveçlilər oyuna motivasiyasız çıxa bilər, onda komandamız nəyə qadir olduğunu göstərməli olacaq. Futbolda necə deyərlər, meydan düz, top yumrudu. Bundan yararlana bilsək, yaxşı olar”.

“Bilirik ki, bu, futbolumuz üçün çox da yaxşı deyil. Reytinqdə daha da aşağı düşəcəyik. Siz də bütün gənclərdən ibarət komandalarımıza baxırsınız, uduzurlar, elə hey uduzurlar. Həm də böyük hesabla. Görəsən, gələcəkdə futbolumuzu nələr gözləyir? Nə qədər əcnəbi məşqçimiz olub, onlar bu qədər yaxşıdısa, niyə inkişaf etmirik? Uşaqlarımız niyə bərbad meydançalarda oynayırlar? Bir çox məsələlər həll olunana qədər belə qalacaq”.