"Sabah" Misli premyer-liqasının 11-ci turunda evdə "Neftçi"nin öhdəsindən gələ bilmədi - 0:0.

"Football-plus.az" xəbər verir ki, "bayquşlar"ın baş məşqçisi Krunoslav Renduliç oyunsonrası mətbuat konfransında jurnalistlərin suallarını cavabladı.

- Matçdan sonra soyunub-geyinmə otağında sanki kimsə ölmüşdü. Futbolçuların ab-havasından elə hiss etdim. Əvvəlcə oyunçularımı təbrik etmək istəyirəm. Onlar bu gün mükəmməl idilər. Son saniyələrə qədər inadkar oyun göstərdik. Əfsuslar olsun ki, futbolda fürsətlərdən yararlana bilməyəndə qələbə qazanmaq olmur. Ən yaxşı fürsət penaltidi. Onu dəqiq yerinə yerinə yetirə bilməyəndə qalib gəlmək çətin olur. Qələbəyə çox yaxın idik, amma iki xal itirdik. Xüsusilə, ikinci hissədə çox yaxşı çıxış etdik. Ağlamaq üçün vaxtımız yoxdu. Sabahdan etibarən növbəti oyuna hazırlaşacağıq.

- "Sabah" qol buraxmamaq üçün ancaq "Neftçi"ylə oynamalıdı? Cari mövsümdə yalnız bu komandadan qol buraxmamısız.
- Gərək federasiyadan xahiş edək ki, növbəti rəqibimiz də "Neftçi" olsun (gülür). Amma bizə müsbət cavab verəcəklərinə inanmıram.

- Komanda son dörd oyunda qələbəyə həsrət qalıb. Ağlamaq üçün vaxtınız olmasa da, azarkeşləri ağladırsız. Uğursuz seriya hansısa enişdən xəbər verir, yoxsa zaman lazımdı?
- Belə hallar futbolun bir parçasıdı. Amma həmin oyunlarda xallara layiq idik. Azarkeşlərimiz klubumuzla bərabərdi. Bizi dəstəkləməyə davam etsinlər. Bəzən hər oyunda qələbə qazanmaq alınmır. Ümid edirəm ki, növbəti matçda qalib gələcəyik və bunu azarkeşlərimizlə birgə qeyd edəcəyik.

- Sofian Çakla komandanın aparıcı futbolçularından biri idi. İndi demək olar ki, meydana çıxmır. Mövqe uğrunda rəqabətdə uduzur?
- Futbolda belə hallar baş verir. Çakla zədəli idi, bu üzdən iki həftə müalicə aldı. Dünən isə xəstələndi. İqor onu əvəz etdi və yaxşı oynadı.

- Üç xal üçün yaxşı oyun kifayət etsəydi, daha çox xalınız ola bilərdimi?
- Biz yaxşı oynamalıyıq. Əks halda, xal qazana bilmərik. Bu gün yaxşı hallardan biri də qol buraxmamağımız oldu.

- Avrokuboklar uğrunda mübarizə aparan rəqiblərlə oyunlarda heç-heçə etmisiz. İlk "dördlük"də qərarlaşmaq hədəfinizin təhlükə altında olduğunu düşünürsüzmü?
- Mən yalnız sabahı fikirləşirəm. O vaxta qədər hələ çox var. Daha çox xallar qazanmalıyıq. İndiki durumumuzla razı deyiləm. Daha yaxşısını etməliyik. Yüksək pillələrə layiqik. Futbolçularımın oyunundan razıyam. Əfsuslar olsun ki, bu gün bəxtimiz gətirmədi.

KƏNAN BAHADIR