Misli premyer-liqasında 10-cu turu arxada qoyduq.

Təbii ki, son turla bağlı da maraqlı məqamlar var. Və bunların başında “Neftçi”nin qələbəsiz oyunlar seriyasına son qoyması dayanır.

Tur isə Tovuzda keçirilən “Kəpəz” – “Qarabağ” oyunu ilə start götürdü. Gəncəli azarkeşlər yığma fasiləsində “Neftçi” üzərindəki qələbənin sevincini doyunca yaşadılar. Amma “Qarabağ” onlara qonaq gələn kimi müsibət başladı. Çempion növbəti darmadağınla mövqeyini möhkəmlətdi, “Kəpəz”ə isə bu mövsüm elitada yerini qorumaq çox çətin olacaq.

Cari mövsümdə yalnız “Qarabağ”a uduzan “Araz-Naxçıvan” bu dəfə Şamaxıdan 3 xalla qayıtdı. “Şirlər”in evdəki uğurlu oyunlar seriyası qırıldı. Naxçıvan təmsilçisinin yüksək yerlər uğrunda mübarizə apardığı heç kimə sirr deyil. Ötən tur Bayıldan əliboş qayıdan “Şamaxı” isə bu oyuna lazımınca köklənə bilməmişdi. Ümumiyyətlə, şamaxılı azarkeşlərin arzu-istəyinə baxmayaraq, komanda bu mövsüm elə yalnız elitada yerini möhkəmlətmək uğrunda oynamağa qadirdi.

Oktyabrın 19-u həm də “Neftçi” azarkeşlərinin yaddaşına yazıldı. Onların sevimli komandası Samir Abasovun rəhbərliyi altında keçirdiyi ilk oyunda, nəhayət, özünə bənzədi. Əlbəttə, bir oyuna görə nəticə çıxarmağa dəyməz. Ancaq paytaxt klubu yeni baş məşqçinin gəlişi ilə əməlli-başlı silkələnib.

Zirədə hər iki komanda 1 xalla kifayətləndi. “Zirə” ilə “Sabah”ın yüksək yerlər uğrunda mübarizə apardığı heç kimə sirr deyil. Masazır təmsilçisi fasiləyə üstün yollansa da, qələbəni qoruya bilmədi. Daha dəqiqi, “qartallar” oyun ərzində yaratdığı yeganə real qol vəziyyətindən maksimum yararlandı. İnanılmaz praqmatizm bu olsun gərək!

“Sumqayıt” – “Turan Tovuz” oyunu da maraq doğururdu. Baş məşqçi kimi elitada debüt edən Vaqif Cavadov özündən qat-qat təcrübəli Kurban Berdıyevlə bacara bilmədi. Premyer-liqada 3-cü mövsümünü keçirən Tovuz təmsilçisi bunadək səfərdə keçirdiyi 5 görüşdə üç qol vurmuşdu. Həmin rekord Sumqayıtda yeniləndi. “Sumqayıt”, “Səbail” və “Kəpəz” bu mövsümün aşkar autsayderləridi. Çox güman, sonda məhz bunlardan biri elitadan gedəcək.

ƏSƏD SEYİDOV