U-21-lər arasında AÇ-2025-in seçmə oyunu
F qrupu

İngiltərə - Azərbaycan 7:0 (2:0)
13. Ceyms Bidli
12. Kallum Doyl
(3. Lüis Holl, 71)
15. Çarli Kressuell
4. Carell Kuansa (k)
21. Ceymi Baynu-Gittens
(23. Deyn Skarlett, 61)
16. Elliot Anderson
18. Arçi Qrey
(4. Cek Hinşelvud, 71)
17. Samuel Aylinq-Cunior
20. Morqan Rocers
(7. Omari Hatçinson, 61)
8. Aleks Skott
(6. Tayler Morton, 71)
10. Ceyms Makeyti
Ehtiyat oyunçular
1. Ceyms Trafford
22. Samuel Tikle
5. Teylor Harvud-Beylis
Baş məşqçi: Benyamin Futçer

12. Xəyal Fərzullayev
15. Süleyman Damadayev
4. Cəlal Hüseynov
5. Mahir Həsənov
3. Rüfət Abbasov
(20. Rüfət Əhmədov, 76)
7. Xəyal Əliyev
(10. Samir Abdullayev, 76)
8. Fərid Yusifli (k)
6. Zeynəddin Abdurəhmanov
2. Abdulla Rzayev
(14. Qurban Səfərov, 86)
9. Musa Qurbanlı
(19. Ağadadaş Salyanski, 76)
11. Nəriman Axundzadə
(17. Murad Vəliyev, 81)
Ehtiyat oyunçular
1. Rüstəm Samiqullin
13. Seymur Məmmədov
18. Rauf Rüstəmli
21. Emin Rüstəmov
Baş məşqçi: Samir Əliyev
Qollar: Ç.Kressuell, 2 (1:0). K.Doyl, 27 (2:0). C.Makeyti, 55 (3:0). C.Hüseynov, 70-öz qapısına (4:0). E.Anderson, 72 (5:0). D.Skarlett, 86 (6:0). O.Hatçinson, 90 (7:0).
Vərəqə: M.Qurbanlı, 29 - sarı.
Hakimlər: İVANA MARTİNÇİÇ, Sanya Rodyak-Karşiç, Maya Petraviç, Sabina Bolic (hamısı Xorvatiya).
Hakim-inspektor: Yens Larsen (Danimarka).
UEFA nümayəndəsi: İqnas Marcinkevicyus (Litva).
15 oktyabr. Bristol. "Aşton Qeyt" stadionu. 14974 tamaşaçı.
Birinci hissəyə 1, ikinci hissəyə 4 dəqiqə əlavə olunub.

U-21-in növbəti fiaskonu yaşayacağını təxmin edənlərin sayı az deyildi. Ən azı ona görə ki, rəqibin, yəni İngiltərənin gücü nəinki ölkəmizdə, dünyada heç kimə sirr deyil. Hətta matçdan əvvəl sosial şəbəkələrdə aparılan müzakirələrdə azı 6-7 qol buraxılacağımız deyilirdi. Belə də oldu. Səbəbkarlara eşq olsun, böyükhesablı məğlubiyyətlərə alışmışıq. Bizi məyus edən millimizin oyun tərzi - rəqibin ciddi müqavimətlə üzləşmədən qollar vurması, hətta bunun üçün böyük güc sərf etməməsidi.
Bəli, hələ azarkeşlər yerini isitməmiş meydan sahiblərinin asanlıqla hesabı açmasından bəlli oldu ki, turnir hədəfi qalmayan yığmamız bizi yanıltmayacaq. Çünki cərimə meydançasının daxilində nəzarətsiz qalan Kressuell Baynu-Gittensin ötürdüyü topu hansısa maneə olmadan başla tora qovuşdurdu. Bu qol rəqibin təzyiqinin azalmasıyla nəticələnmədi. Əksinə, Skott, Makeyti və Rocers fərqi artırmağa çalışırdı. Aylinq-Cuniorun fərqlənməsinə Fərzullayev imkan vermədi. Belədə qolkiperin potensialına arxalanmaq haqda düşünürdük ki, ikinci qolu buraxmaqla ümidləri puç etdi. Daha doğrusu, 27-ci dəqiqədə Doyl fərqləndi. O, Skottun ötürməsini başla "çərçivə"yə yönəltdi. Meydan sahiblərinin təzyiqi birinci hissə ərzində, demək olar ki, fasiləsiz davam etdi. İrəliləyən dəqiqələrdə Fərzullayev Rocerslə Andersonun zərbələrini zərərsizləşdirdisə, Baynu-Gittens, Makeyti və Doyl hədəfi düzgün nişan ala bilmədi.
İkinci yarıda başverənlərə gəlincə, millimiz müsibət yaşadı. Əslində meydan sahibləri bu dəfə də ilk dəqiqələrdə fərqlənə bilərdi. Sadəcə, Fərzullayev Rocersin qarşısını aldı. Bəs ingiltərəli gənclər ruhdan düşdümü, hücumların sayını azaltdımı? Xeyr, komanda axtardığı fürsəti 55-ci dəqiqədə tapdı və Makeytinin müəlliflik etdiyi qolla hesabı darmadağın həddinə çatdırdı. Ceyms Aylinq-Cuniorun ötürməsini başla dəyərləndirdi. Və görünür, hər üç qolun eyni tərzdə vurulması Cəlalı özündən çıxardı ki, onun sayəsində fərqli yolla vurulmuş qola şahidlik etdik. Bolqarıstanda legioner həyatı yaşayan müdafiəçi 70-ci dəqiqədə Hatçinsonun qapı önünə ötürməsini uzaqlaşdırmaq istəyətrkən topu "çərçiyə"yə saldı.
İnsafsız ingilislərin növbəti qolları da özünü çox gözlətmədi. 72-ci dəqiqədə Anderson Hatçinsonun sol cinahdan göndərdiyi topu tora qovuşdurdu - 5:0! Meydan sahibləri dərhal yenidən irəli atılsa da, xoşbəxtlikdən Hatçinsonun zərbəsi qeyri-dəqiq oldu. Buna baxmayaraq, bir qədər sonra hesab yenə dəyişdi. Bu dəfə Skarlett komandasını sevindirdi. O, Hatçinsonun məhsuldar ötürmə sayına görə dubl etməsinə vəsilə oldu. 90-cı dəqiqədə vurulan qolda da həmin futbolçular ön plana çıxdı. Sadəcə, bu dəfə Skarlett məhsuldar ötürmə, Hatçinson qol müəllifi kimi yadda qaldı. Beləliklə, millimizin növbəti biabırçı nəticəsi rəsmiləşdi.
Eh, nə deyəsən?! Biz hələ "Liv Bona Dea Arena"da Slovakiyaya qarşı keçirilən matçın afişasını dərc edərkən "Samir Əliyev üçün əcəl zəngi" sərlövhəsindən yararlanmışdıq. Sən demə, onun səbri daha böyük fiaskoları həzm edəcək qədər geniş imiş... Millimiz üçün AÇ-2025-in seçmə mərhələsi başa çatdı. Elə Samir Əliyevin karyerasındakı U-21 mərhələsi də!
Oktyabrın 15-də bu qrupda keçirilən digər oyunlar belə nəticələnib: Lüksemburq – Şimali İrlandiya 0:0, Serbiya – Ukrayna 1:0.
1. İngiltərə 10 8 1 1 41-6 25
2. Ukrayna 10 8 0 2 20-7 24
3. Serbiya 10 5 1 4 13-18 16
4. Ş.İrlandiya 10 3 2 5 10-10 11
5. Lüksemburq 10 2 2 6 6-23 8
6. Azərbaycan 10 1 0 9 4-30 3

KƏNAN BAHADIR