“Neftçi” Azərbaycan futbolunun “yağ küpü”dü. Bunu klubun tarixi, yaxın keçmişdə imza atdığı uğurlar, böyük azarkeş kütləsi, paytaxtı təmsil etməsi və ən əsası büdcəsinə görə deyə bilərik. Qısası, “ağ-qaralar”ın ciddi uğurlara imza atmasına mane olacaq hansısa səbəb yoxdu. Təbii ki, imkanlardan düzgün istifadə olunsa”.

Bu sözləri iyunun 28-də, Roman Qriqorçukun “Neftçi”nin baş məşqçisi təyin edilməsindən iki gün sonra qələmə aldığım “Qriqorçuk “yağ küpü”ndən “qaymaq” hazırlaya biləcəkmi?” yazısında qeyd etmişdim. Hazırlaya bilmədi! Klubun tarixinə və keçmişdə qazandığı uğurlaramı hörmətlə yanaşılmadı? Azarkeşlərmi komandanı meydanda tək qoydu? İmkanlardanmı düzgün istifadə olunmadı? Bu suallardan yalnız ikincinin cavabı bəllidi: tərəfdarlar bütün oyunlarda əvvəldən sona qədər kollektivi dəstəklədi. Qalanları haqda dəqiq danışmaq, təəssüf ki, çox çətindi. Elə bərbad ab-hava formalaşıb ki, əksər düşüncələrə şübhəylə yanaşmaq tam mümkündü.

Elə həmin yazıda Qriqorçukun sonuncu iş yeri “Çernomorets”də 2023/24 mövsümünü 12-ci pillədə başa vurduğunu, amma bunda baş məşqçinin günahsız olduğunu, Ukraynadakı məlum müharibənin nəticələrdə böyük rol oynadığını demişdim. Burda yanıldığımı etiraf etməliyəm. Görünür, həmin nəticəni Qriqorçukun tükəndiyini sübut edən məqamlar sırasına daxil etmək lazım idi. Bu fikir təkcə mənə aid deyil. Ukraynalı futbolsevərlər də belə düşünür. Mütəsəssisin istefa verdiyi haqda xəbərlərin rəy bölümünə tənqidlər yağır. Hətta biri vaxtilə Kiyev “Dinamo”sunun məşqçiylə danışıqlar apardığını deməklə yanaşı, sövdələşmənin alınmadığına görə şükür edir.

Yanlış anlaşılmasın. “Neftçi”nin 9 oyunluq qələbə həsrətinin, 9-cu pillədə qərarlaşmasının yeganə günahkarı Qriqorçuk deyil. Heç isveçli Yens Andersson da deyildi. Yuri Matias demişkən, “hamımız günahkarıq”. Sadəcə, bunu adı çəkilənlərdən başqa etiraf edən yoxdu. Bundan sonra necə olacaq? “Neftçi” dirçələcəkmi? Azı avrokuboklar, ən yaxşı halda, ikinci pillə uğrunda mübarizə apara biləcəkmi? Bu sualların cavabını zaman verəcək. Bilinən odu ki, Qriqorçuk “yağ küpü”ndən “qaymaq” yox, “zəhər” hazırladı. Hə, bir də o, çətin ki, Azərbaycana yenidən ayaq basa. İşgüzar səfər olsa belə!

KƏNAN BAHADIR