Avropa Liqasının 2-ci turunun "Qarabağ" - "Malmö" oyunundan əvvəl ağdamlıların hücumçusu Olavio Juninyo jurnalistlərin suallarını cavablandırıb:

- Bizi çox önəmli oyun gözləyir. Bütün ölkə, şəhər, azarkeşlər və komandamız üçün önəmli oyundu. Çalışacağıq ki, azarkeşlərimizi sevindirək.

- Üç oyundu avrokuboklarda fərqlənə bilmirsən. Bu amil nə ilə bağlıdı?
- Doğrudu ki, imkanlar olsa da, istifadə edə bilmirəm. Bütün bunları aradan qaldırmağın bir yolu var - məşqlərdə əzmlə çalışmaq. Baş məşqçimiz də mənə kömək edir ki, daha məhsuldar olum, komandaya çox xeyrim dəysin. Yenidən komandaya faydalı olmağa səy göstərirəm.

- Hər futbolçu Çempionlar Liqasında oynamaq istəyər. Sən də bunu çox istəyirdin. Amma elə alındı ki, Avropa Liqasında çıxış edirsiz. Bunun motivasiyası fərqli deyil ki? Əvvəlki Juninyonu görə biləcəyik? Məyusluq dövrünü keçmisən, ya yox?
- Təbii ki, Çempionlar Liqası qitənin ən nüfuzlu klub turniridi. Orda oynamaq mənim də arzumdu. Amma Avropa Liqasında oynamağı da arzulamışam. Bu yarışlarda fərq görmürəm. Eyni motivasiya, eyni istək var. Başa düşürəm ki, eyni Juninyonu görmək istəyirsiz. Bu futboldu. Bəzən uğursuzluq seriyası olur, top qapıya getmək istəmir. Bayaq dediyim kimi, bu çatışmazlığı aradan qaldırmaq üçün məşqlərdə daha çox işləmək lazımdı. Əsas odu ki, yanımdakı insan, baş məşqçimiz mənim işimə inanır, mən də özümə güvənirəm. Ümid edirəm ki, tezliklə qollar gələcək. Əvvəlki və indiki Juninyo arasında fərq yoxdu. Elə həminkiyəm, dəyişməmişəm. Qoldan çox yaxşı oynamağı fikirləşirəm. Qollar da daha çox işləməyin nəticəsidi. Buna görə də daha çox çalışıram.

RÖYANƏ OĞUZ