Çərşənbə günü “Neftçi”də gözlənilməz ayrılıq yaşandı.

Bəli-bəli, gözlənilməz... Nəticələr nə qədər pis olsa da, çoxu rəhbərlikdən kiminsə istefa verəcəyini ağlına gətirmirdi. Hər halda, Yens Andersson daha “ağ-qaralar”ın idman direktoru deyil, haqqında keçmiş zamanda danışmalıyıq. O da bu vəzifənin öhdəsindən layiqincə gələ bilmədi.

Xatırlayırsızsa, isveçli mütəxəssis təyinatı açıqlanandan sonra azarkeşlərə böyük vədlər vermişdi. Lakin klubun idman departamentiylə bağlı bütün məsələlərin məsuliyyətini daşıyan funksioner skaut xidmətinin təkmilləşdirilməsi, çalışma mədəniyyətinin inkişaf etdirilməsi, əsas və əvəzedici komandanın müsbət nəticələr qazanması və müasir dünya standartlarına uyğun bazanın inşası kimi prosesləri düzgün həyata keçirə bilmədi. O özü əvvəlcədən belə demişdi: “uğur əldə etməsəm, burdakı işim çox davam etməyəcək”. Yaxşı ki, heç olmasa, bu sözünü “yemədi”.

Maraqlıdı ki, klub vida mesajında Anderssonun gedişini uğursuz nəticələrlə əlaqələndirməyib. Belə məqamlarda ağla “üzrü qəbahətindən betər” ifadəsi gəlir. Yenə də bu yöndə fikirləşərkən yüz ölçüb, bir biçməliyik. Allah hamıya cansağlığı versin, bəlkə isveçlinin qohum-əqrəbasından kimsə vəfat edib? Görünür, baş məşqçi Roman Qriqorçukun istefa səbəbi də “Neftçi”də pozulan səhhətiylə bağlı olsa, təəccüblənməməliyik.

O ki qaldı yeni idman direktoru və baş məşqçi seçiminə... Tahir Süleymanov məsləhət görür ki, “Neftçi” azarkeşlərin çağırışına qulaq versin. Axı onların əksəriyyəti birinci vəzifə üçün Tahir bəyi, ikinciyə isə Tərlan Əhmədovu tələb edir. Bakılıların hansı addımı atacağını bilmirik. O bəllidi ki, “Neftçi” legioner mütəxəssislərdən xeyir görməyib. Yeri gəlmişkən, dünən “ağ-qaralar”la bağlı daha bir maraqlı xəbər yayıldı. Klub rəhbərliyi “Qarabağ”la prinsipial matç ərəfəsində bir araya gəlib, müzakirələr zamanı Qriqorçuka dəstək ifadə olunub. Rəhbərlik ukraynalıya bir müddət də şans verməyi qərara alıb. Derbinin nəticəsindən asılı olmayaraq!

KƏNAN BAHADIR