Dünən Azərbaycan Respublikası Dövlət Neft Şirkətinin (SOCAR) yaradılmasından 32 il ötdü.

Qurumun futbolla sıx bağlılığı heç kimə sirr deyil. Bilindiyi kimi, prezidenti Rövşən Nəcəf həm də AFFA-da eyni vəzifəni icra edir. Bununla belə, SOCAR Türkiyə nəhəngi "Qalatasaray"ın sponsorlarından biridisə, "Neftçi"nin baş sponsorudu. Bəxt 31-ci ilinin son günlərində futbolla bağlı fəaliyyətində şirkətin üzünə gülmədi. İstər əsas, istərsə də aşağı yaş qruplarını əhatə edən millilər uğursuz nəticələrlə Rövşən Nəcəfin rəhbərlik etdiyi AFFA-nı tənqid atəşinə məruz qoydu. İstanbul təmsilçisi "Yanq Boyz"a sürpriz şəkildə məğlub oldu ki, nəticədə Çempionlar Liqasının liqa mərhələsinə vəsiqə qazana bilmədi.

"Neftçi"nin durumundan da xəbərdarıq. Bakılılar SOCAR-ın 32 yaşını sosial şəbəkə hesablarından təbrik etsə də, bunun istənilən səviyyədə olmadığını bilirik. Yeni mövsümdə qələbəyə həsrət qalan komanda azarkeşləri kimi, əsas sponsorunun qarşısında da xəcalət çəkir. Hər halda, burda şirkətin hansısa günahı yoxdu. Ona görə ki, klub SOCAR sayəsində ölkənin ən zənginləri sırasındadı və maliyyə sıxıntısından söhbət gedə bilməz. Bəs "ağ-qaralar"ın dərdi nədi?

Zarafat deyil, bakılılar turnir cədvəlində yalnız maliyyə problemləri içində üzən və ev oyunlarını Gəncədə keçirə bilməyən "Kəpəz"i qabaqlayır. Heyət yetərincə genişdi, baş məşqçi təcrübəli Roman Qruqorçukdu. Mütəxəssisin təyinatı zamanı əksəriyyət adıyla bağlı söz oyunu edərək "Roman roman yaza biləcəkmi?" ifadəsindən istifadə edirdi. İndi kollektiv cızma-qaradan başqa nəyisə xatırlatmır.

Maraqlıdı ki, bu üzdən çalışdırıcını günahlandıranların sayı azdı. Əlbəttə, Roman İosifoviçin karyerasına, xüsusilə "Qəbələ" ilə bacardıqlarına bələd olanlar səbəbkarın məhz o olmadığını bilir. Lakin klubun bu yöndə diqqətçəkən ideyası var. Mütəxəssis hər transferdən sonra yeni futbolçuyla bağlı açıqlama verir. Elə tərifləyir... Gəl, görəsən. Belədə Qriqorçukun da uğursuz heyətlə bağlı danışarkən əli-qolu bağlanır. O, heç vaxt deyə bilməz ki, seçimi mən etmədim və ya bəyənmədim, amma gətirdilər. Qısası, bütün məsuliyyət baş məşqçinin üzərindədi və müyəxəssis istəsə də, bundan boyun qaçıra bilməz. Baxmayaraq ki, nəticələrdə Emin Mahmudovla Ramil Şeydayevin böyük "xidmətləri" var. Artıq onların arasında soyuq müharibənin getdiyi haqda şayiələr də yayılıb. İstər millidə, istərsə də "Neftçi"də özünü yaxşı tərəfdən göstərə bilməyən futbolçuların amalı bilinmir.

O bəllidi ki, komandanın çətin günləri hələ qabaqdadı. Qriqorçuk demişkən, artıq qalib gəlməmək üçün səbəb yoxdu. Mütəxəssis fasilədə ümumi vəziyyəti yaxşı təhlil etdiyini, durumun nə yerdə olduğunu bildiyini deyir. İddia edir ki, son iki həftə ərzində komandanı komplektləşdirib. Bu, nigaran "Neftçi" azarkeşləri üçün böyük vəddi. İndi tərəfdarlar komandadan ardıcıl qələbələr gözləyir. Yəqin ki, onlar uğurlu seriyanın "Zirə"ni məğlub etməklə başlamasını istəyir. Nə dərəcədə alınar, bilmirik. Bu yöndə arxayın danışa bilmək üçün "ağ-qaralar"ın dövrənin qalan oyunlarındakı performansına, nəticələrinə şahidlik etmək lazımdı. Əmin olduğumuz məsələ isə tezliklə söz-söhbətə son qoyulmasının vacibliyidi. Yerli futbolçular, xüsusən də Emin və Ramil toparlanmalı, uğura köklənməlidi. Təbii ki, yerli və ən təcrübəli oyunçuların silinib-atılmasındansa, daha yaxşı formada meydana çıxmasının tərəfdarıyıq. Amma bunu onlar özləri istəməlidi.

Ümumiyyətlə, hər kəs qeyd-şərtsiz buna köklənməlidi. Vaxtilə həmin ab-havanı Adrian Mutu yaratmışdı. Hər uğursuz nəticədən sonra yağlı vədlər verir, “Neftçi”nin strategiyası olduğunu, böyük layihələrin həyata keçiriləcəyini deyirdi. İndi isə fərqli danışır. “Digi Sport” nəşrinə açıqlama verən sabiq baş məşqçi dilə gətirir ki, “Neftçi”nin maliyyə şərtləri məni həmin təklifi qəbul etməyə vadar etdi. Sözsüz, Qriqorçuku da vəd olunan qazanc heyrətə gətirib. Onun da gələcəkdə belə danışa biləcəyini istisna etmirik. Məhz bu üzdən yuxarıda SOCAR-dan danışdım, şirkətin futbola ayırdığı maliyyəni xatırlatdım.

Uzun illərdi ki, həmin maliyyə gücü “Neftçi”nin əlindədi və çoxunun ağzını sulandırır. İndi nəinki Qriqorçuk, Cenk Sümər və Yens Andersson da işiylə kluba, sadəcə, “qara qızıl”dan pay götürmək yox, məhz bəhs edilən strategiyanı həyata keçirmək üçün gəldiyini sübut etməlidi. “Neftçi”nin şirkətə doğum günü hədiyyəsi isə yalnız qara yox, həm də ağ gün olmalıdı!

KƏNAN BAHADIR