Səbail (Bakı) - Kəpəz (Gəncə) 4:0 (2:0)
1. Hüseynəli Quliyev - 5,0
8. Qorka Laruçça - 5,5
44. Amir Bilali - 4,5
3. Dmitri Litvin - 5,0
74. Yusif Nəbiyev (k) - 4,5
77. Fərid Nəbiyev - 6,0
(17. Gülağa Əsədov, 77) - qiymətsiz
5. Gitay Sofir - 6,0
(83. Nihad Quliyev, 77) - qiymətsiz
21. Ayman Bouali - 6,0
20. Mərt Çəlik - 4,5
(6. Cabir Əmirli, 77) - qiymətsiz
11. Rüfət Abdullazadə - 5,0
(7. Madi Queta, 71) - 4,5
14. Suleyman Alluş - 6,5
(10. David Qomis, 81) - qiymətsiz
Ehtiyat oyunçular
12. Əlirza Müştəbazadə
18. Süleyman Əhmədov
15. Vüsal Məsimov
19. Samir Abdullayev
16. Emin Rüstəmov
Baş məşqçi: Şahin Diniyev
Komandanın ən yaxşısı: Süleyman Alluş

22. Məmməd Hüseynov - 4,5
2. İlkin Qırtımov - 5,0
11. Orxan Əliyev - 4,5
7. Ehtiram Şahverdiyev - 4,5
78. Yeqor Xvalko (k) - 5,0
8. Elmir Tağıyev - 4,5
(6. Nemət Musayev, 69) - 4,5
10. Karim Lkouça - 5,0
(66. Arzu Atakişiyev, 62) - 4,5
19. Lassana Ndiaye - 4,5
(15. Cavad Kərimov, 62) - 4,5
88. Keverton Markolino - 4,5
(44. Nihat Fərəci, 81) - qiymətsiz
77. Viktor Braqa - 5,5
17. Ümid Səmədov - 5,0
 Ehtiyat oyunçular
18. Elgün Bayramov
3. Vurğun Hüseynov
99. Əli Səmədov
28. Redon Mihana
20. Mahir Həsənov
 Baş məşqçi: Adil Şükürov
Komandanın ən yaxşısı: Viktor Braqa

Qollar: F.Nəbiyev, 12 (1:0, R.Abdullazadə). G.Sofir, 34 (2:0, A.Bouali). A.Bouali, 50 (3:0, S.Alluş). S.Alluş, 54 (4:0).
Vərəqələr: E.Şahverdiyev, 21 (qeyri-idman hərəkəti). E.Tağıyev, 57 (qeyri-idman hərəkəti). A.Bouali, 74 (qeyri-idman hərəkəti) - sarı.
Hakimlər: RAUF ALLAHVERDİYEV, Eyyub İbrahimov, Asiman Əzizli, Elvin Bayramov (hamısı Bakı).
VAR hakimi: Rauf Cabbarov (Bakı).
VAR hakiminin köməkçisi: Rəhman İmami (Bakı).
Hakim-inspektor: Babək Quliyev (Bakı).
AFFA nümayəndəsi: Zaur Hacı-Məhərrəmov (Bakı).
23 avqust. Bakı. “ASCO Arena”. 500 tamaşaçı (3200 yerlik).
Hər hissəyə 2 dəqiqə əlavə olunub.
Oyunun qiyməti: 6,0.

Dünən 4-cü turun açılış matçında “Səbail” ilə “Kəpəz” Bayılda üz-üzə gəldi. Bir tərəfdə yeni mövsümdə qələbəyə həsrət qalan “dənizçilər”, o biri tərəfdə nəinki xal, heç qol hesabını da aça bilməyən “sarı-göylər” var idi. Təbii ki, “Səbail” ən azı “dogma divarlar” amilinə görə bir addım öndə idi.

Oyuna fəal başlayan meydan sahibləri qapıya ilk zərbəni 2-ci dəqiqədə vurdu. Qolkiper Rüfətin zərbəsinin qarşısını aldı. Cəmi 10 dəqiqə sonra Rüfətin baxımlı ara ötürməsindən sonra Məmmədlə təkbətək qalan Fərid bu dueldən qalib ayrıldı - 1:0. Meydanda dominantlıq edən “dənizçilər” 34-cü dəqiqədə qonaqları ikinci dəfə mərkəzə dəvət etdi. Kevertonla Elmirin arasında yaşanan ötürmə anlaşmazlığından sonra topu ələ keçirən Laruçça komandasının sürətli əks-hücuma çıxmasına səbəb oldu. Epizodun davamında isə Boualinin boşluqda olan Sofirə göndərdiyi ötürməni yarımmüdafiəçi ustalıqla dəyərləndirdi - 2:0. 37-ci dəqiqədə “sarı-göylər” ilk real qol imkanını əldə etdi. Ümidin qapı önünə göndərdiyi ötürməni saxlamadan, birbaşa “çərçivə”yə göndərən Viktorun zərbəsində azca dəqiqlik çatmadı. İlk yarıda qapılara başqa qol vurulmadı. Düşünürdüm ki, “Kəpəz” 2-ci hissəyə daha yaxşı başlayacaq, ən azı qollardan birinin əvəzini çıxacaq. Bəli, qonaqlar inamlı başladılar. Amma yenə də qolu Diniyevin komandası vurdu. 49-cu dəqiqədə Litvinin müdafiənin arxasına göndərdiyi uzun ötürmə 3-cü qol üçün zəmin yaratdı. Həmin boşluqda topu götürüb irəliləyən Alluşun qapı önünə etdiyi ötürməni Bouali qola çevirdi. Alluşun ofsaydda olduğunu bildirən referi əvvəlcə qolu qeydə almadı. Lakin VAR-la əlaqə saxladıqdan sonra heç bir ofsaydın olmadığını və qolun qeydə alındığını bildirdi.

Cəmi 5 dəqiqə sonra gəncəlilər qapısında 4-cü qolu gördü. Məmməd Rüfətin zərbəsini dəf etsə də, geri dönən topu Alluşun yaxın küncə göndərməsinin qarşısını ala bilmədi - 4:0. Qonaqlar buraxılan qollardan birinin əvəzini çıxmağa çox yaxın idi. 85-ci dəqiqədə Viktorun cərimə zərbəsindən sonra qapı önünə göndərdiyi topu tora qovuşdurmağa çalışan Xvalkoya öncə qapıçı, ardından Yusif mane oldu. 
Beləliklə, “Səbail” yeni mövsümdə ilk qələbəsini qazandı. Xala və qola həsrət qalan “Kəpəz”in baş məşqçisi Adil Şükürovun başının üzərini isə qara buludlar almaqdadı.

Gözdən qaçmadı
* “Kapaz Ultras” və “Xəmsə” komandanı yalqız qoymamışdı. “Dənizçilər” də tribunadakı yerində idi. 
* Oyunun sonlarında “dənizçilər” “Kəpəz” Gəncə, rəqibimiz deyilsən” şüarlarını səsləndirdi.