Futbolumuz üçün avrokubok həftəsi arzulanan kimi başlamadı.

“Qarabağ”ın Zaqreb “Dinamo”sunu məğlub etməsi bir yana, “sülh”ə razı salması belə bizi xoşbəxt edəcəkdi. İndi “köhlən atlar”la bağlı cüzi ümidləri avqustun 28-nə saxlamışıq.

Bu gün həmin nigaranlığa bir qədər fasilə verməliyik. Ona görə ki, “Zirə” Konfrans Liqasının pley-offunda ilk sınağıyla üz-üzədi. “Qartallar” “Omoniya”nın qonağıdı. Rəqibin favorit olduğu bəllidi. Amma bu nə qələbə inamına mane deyil, nə də həmin xəyalın reallaşmasına...

Xatırlayırsızsa, “Qəbələ”nin ötən mövsüm uğursuz nəticələrinin təməli məhz bugünkü oyunun keçiriləcəyi “GSP Arena”da qoyuldu. “Omoniya”nın 4:1 hesabıyla məğlub etdiyi “qırmızı-qaralar” “futbol ili”nin sonunda 1-ci liqaya endi. Bəlkə də fərqli nəticə komandanı fərqli döyüş ruhuna daşıya, premyer-liqada uğurlu olmasına səbəb ola bilərdi. Qısası, “GSP Arena” bizim üçün uğurlu olmadı. Baxmayaraq ki, Qurban Qurbanov və komandası həmin stadionda “Omoniya”nı məğlub etmişdi – 4:1.

Bəli, həmin nəticəni indi də arzulamaq yetərincə xoşdu. Lakin fantastik səslənir. “Bu futboldu, futbolda hər şey olur” şablonuna sığınmaq isə absurd görünür. Yenə də bizə azı heç-heçə, yaxşısı qələbə lazımdı. “Cütün taleyini cavab matçına saxlamayaq” desəm, çox şey istəmiş olaram? Bilmirəm. Təki “Zirə” nigaranlığımızı ikiyə qatlamasın.

KƏNAN BAHADIR