"Turan Tovuz" "doğma divarlar" arasında keçirdiyi ilk matçda qələbə qazandı (bax: səh. 6). Bəli, bu həm də yeni baş məşqçi Kurban Berdıyevin qazandığı ilk 3 xaldı. Lakin hələ Berdıyevi və komandasını mədh etməyin vaxtı deyil.

Bazar günü Tovuz şəhər stadionunda qüsursuz olan, komandaya əvəzsiz motivasiya verən yeganə məqam azarkeşlərin möhtəşəm dəstəyi idi. Şübhəsiz , Tovuz əhli qalan rayonlardan olan tərəfdarlar üçün gözəl örnəkdi. Təbii ki, "Qarabağ" Ağdamda, "Araz-Naxçıvan" Naxçıvanda, "Kəpəz" Gəncədə çıxış etsə, daha dəqiq müqayisə edə bilərik. Lakin günün reallığı məlum, nəticə dəyişməzdi. Tovuzlu azarkeşlər çempionatımızın şəriksiz bir nömrəsidi. Məsələn, "Ultras Turan" fanklubu matçdan əvvək futbolçuları çağıraraq jest və şüarlar ilə ruhlandırmaq istədi. Təəssüf ki, Şəhriyar Əliyev onlara qarşılıq versə də, qalan oyunçular laqeyd idi. Düzdü, azarkeşlər komandadan nə incidi, nə də irad bildirdi. Lakin futbolçular belə mövzularda həssas olmağa borcludu. Tribunada yer alan təxminən 20 nəfərlik "Ultras Sumqayıt", 30 nəfərlik "Kimyaçılar" fanklubları isə gözləniləndən daha sakit idi. O başqa məsələ ki, “Sumqayıt”ın oyunu da onlara zövq vermədi.

"Turan Tovuz"un hədəfləri və strategiyası ilə bağlı İdarə Heyətinin sədri Ehtiram Quliyevlə danışmaq istəsək də, təklifimizi geri çevirdi. Dedi ki, hələ müəyyən mövzular haqda danışmaq üçün bir qədər vaxta ehtiyacı var. Təsbehini çevirə-çevirə Samir Abasovu məğlub edən Kurban Berdıyev də çox danışmadı. Daha doğrusu, yalnız matçla bağlı suallara cavab verəcəyini dedi. Diqqəti çəkən məqam "zövq aldım" kəlməsindən tez-tez istifadə etməsiydi. Bu, mənə mövsüm başlamamış mediaya müsahibə verən Samir Abasovun "Roman Qriqorçukla Kurban Berdıyevi udmaq mənə zövq verəcək" sözlərini xatırlatdı. Təsadüf deyilsə, onda "bozqurd"un baş məşqçisi sözarası həmkarına ilişdi. Samir Abasov isə oyunboyu futbolçularına və hakimlərə narazılıq etdi. Bəzi anlarda haqlıydı. Ona görə ki, 54-cü dəqiqədə Kristian da Silva topsuz olan Cordan Rezabalanın ayağını tapdalayaraq əzdi və Tural Qurbanov azı sarı vərəqəni haqq edən futbolçuya xəbərdarlıq etmədi...

"Sumqayıt" mütləq yeni transferlərlə güclənməlidi. Təbii ki, klub prezidenti Riad Rəfiyevin yüksək yer tutmaq tələbi varsa... "Turan Tovuz" isə düz yoldadı. Yol ayrıclarında səhv etməsə, komandanın bu mövsüm azarkeşlərini böyük uğurlarla sevindirmək ehtimalı böyükdü.

KƏNAN BAHADIR