Artıq bu həftə Misli premyer-liqasında 2024/25 mövsümü start götürdü.

“Kəpəz” mövsümə “Sumqayıt”la səfər oyunu ilə başladı (0:2). Adil Şükürovun komandası hazırlığı elə doğma Gəncədəcə reallaşdırdı. Mövsümlərarası fasilədə heyət xeyli dəyişikliyə məruz qaldı. Amma getməyənlər, yola bu komanda ilə davam edənlər də var. Bunlardan biri müdafiəçi Yeqor Xvalkodu. 2022-ci ildən “sarı-göylər”in uğurları üçün çalışan belaruslu futbolçu ilə birillik yeni müqavilə imzaladı.
- “Kəpəz”lə yeni müqavilə imzaladın. Başqa təkliflər vardı, burda qalmağında əsas amil nə oldu?
- Bəli, imzaladım. Bu, komandada üçüncü ilim olacaq, buna sevinirəm. Bəli, bir neçə təklif var idi. Baxın, mən özüm komandada qalmaq istəyirdim, çünki şəhəri, azarkeşləri, komandanı bəyənirəm. Klubumu dəyişməyin mənasız olduğunu gördüm.

- Karyeranın “Kəpəz”dəki illəri nə ilə yadda qalıb?
- Mənim üçün ən əsas məqam özümə qarşı olan münasibətdi. Özümü burda rahat hiss edirəm. Əlbəttə, həmişə daha çox istəyirəm, amma prinsipcə hər şeyin necə getdiyindən məmnunam. İlk dəfə idi ki, milliyə “Kəpəz”dən çağrılırdım. Mənim üçün önəmli olan həm də azarkeşlərdi. Komandaya necə münasibət göstərirlər... Meydanda onlar üçün mübarizə aparmamaq mümkün deyil.

- Komandan son günlərdə bir neçə yeniliyə imza ataraq üç yeni tərəfdaşla anlaşdı. Bundan sonra maliyyə problemləri həll olunacaqmı?
- Düzünü desəm, iki ildi həmişə oxuyuram ki, sponsor məsələsi həll olunacaq və hər dəfə deyilən kimi olmur. Ona görə də sponsor mövzusunu müzakirə etməkdə məna görmürəm. Meydana sponsor çıxmayacaq ki.... Oyunçuların müqaviləsi var. Çıx, oyna, özünü göstər.

- Növbəti mövsümə tam hazırsız? Klub və futbolçu kimi hədəfləriniz nədən ibarətdi?
- Düşünürəm ki, biz hələ tam hazır deyilik. Ona görə də ilk oyunlar baş məşqçimizin dediyi kimi olacaq. Əlbəttə, siz həmişə yüksək yerlər üçün mübarizə aparmaq istəyirsiz, amma obyektiv cəhətdən bunu etmək çətindi. Vəzifəmiz komandanı premyer-liqada saxlamaqdı. Şəxsi məqsədlərim hər matçda oynamaq və futbolçu kimi inkişaf etməkdi.

- Komandaya gələnlər, komandadan ayrılanlar oldu. Hazırkı komanda nəyə qadirdi?
- Nəyə qadir olduğumuzu indi qiymətləndirə bilmirəm. Necə deyərlər, mövsüm hər şeyi göstərəcək

- Bu illər ərzində Tərlan Əhmədov, Azər Məmmədov və Adil Şükürov kimi baş məşqçilərlə çalışmısan. Bu üçünü ayrı-ayrılıqda necə təsvir edərdin?
- Hər məşqçinin öz fəlsəfəsi, oyun tərzi var. Bu məşqçilərin rəhbərliyi ilə biz tapşırığı yerinə yetirdik, ən əsası, onların hər biri ilə bir futbolçu kimi yetişdim. Bütün mütəxəssislərlə yaxşı münasibətim var. Bu insanlara hörmət edirəm.

- Yeni mövsüm başlayır. Əksər komandalar köklü dəyişikliklər etdi.
- Maraqlı çempionat olacaq. Təbii ki, sonuncu olmaq istəmirik. Ötən mövsümə pis başlamışdıq. Daha sonra xilas olmaq məcburiyyətində qaldıq. Ona görə də bu il ötənilki ssenarini təkrarlamaq istəmirik.

- Azərbaycanda nəyi bəyənırsən, oynadığın başqa ölkələrlə müqayisədə təqdir edirsən?
- Prinsipcə, hər şeyi bəyənirəm. Ən əsası odu ki, sizinkilər həmişə yardımsevər, xeyirxah insanlardı.

- Azərbaycanı Avropa yarışlarında təmsil edən klubları izləyirsənmi? Təxminlərini bilmək istərdim...
- Bəli, izləyirəm. Bütün oyunları görməmişəm, amma Avropa yarışlarında Azərbaycan komandalarını izləməkdə maraqlıyam. Proqnoz vermək çətindi.

- Gəncəli azarkeşlər daha da emosional olur. Azarkeşlərin bəzən sərt reaksiya verməsi səni narahat edir?
- Baxırsan ki, azarkeş əsəbi olsa da, qəbul etməlisən. Çünki hər oyunumuzu izləyən bu insanlar uşaqlıqdan komandaya könül verib. Ona görə də bir “Kəpəz” futbolçusu onlara hörmət etməyə bilməz.

- Futbolçularınızdan kiməsə Azərbaycanda oynamağı məsləhət görmüsən? Ailənə və dostlarına bura haqqında nə deyirsən?
- Yox. Dostlarıma yalnız ölkə, çempionat və s. soruşduqda məsləhət görmürəm. Onlara deyirəm ki, bilirsiz, mənim bura xoşuma gəlir, amma burda başqası üçün çətin ola bilər.

RÖYANƏ OĞUZ