Bu gün və sabah keçiriləcək oyunlardan sonra komandalarımızın Konfrans Liqasının 3-cü təsnifat mərhələsinə keçib-keçməyəcəyinə aydınlıq gələcək.

Bir neçə saat sonra “Sumqayıt” Macarıstanda “Fehervar”la qarşılaşacaq. “Kimyaçılar”ın acınacaqlı durumda olduğu bəllidi. Ona görə ki, Samir Abasov nəinki ilk matçda qırmızı vərəqə alan Murad Xaçayevə layiqli əvəzləyici tapıb, hətta ehtiyat oyunçular skamyası da o qədər keyfiyyətli deyil. Səfər oyunu olduğunu nəzərə alsaq, şans bir qədər də azalır. Onsuz da Samir Abasov “şərti şumda kəsmişdi”. Yəni hələ birinci matçdan əvvəl demişdi ki, heyətimiz avrokuboklarda mübarizə aparmaq üçün yetərli deyil. Hər halda, “gənclik şəhəri”nin təmsilçisinin möcüzəni bacaracağına inanmalıyıq.

Sabah isə “Sabah” ilə “Zirə” meydana çıxacaq. “Bayquşlar”ın səfərdən üç qolla dönməsi ümidləri xeyli artırıb. İş orasındadı ki, komandanın evdə keçirəcəyi matça azarkeş marağı istənilən səviyyədə deyil. Niyə, ay camaat? Axı komandanın vaxtilə digər təmsilçilərimizə qan udduran “Makkabi”ni darmadağın etməsi hamını sevindirmişdi. “Bank Respublika Arena”ya yollanmaq, tribunaları doldurmaq çətin olmamalıdı. Bəli, “Sabah” yeni klubdu və hələ azarkeş kütləsi böyük deyil. Lakin Kişvardadakı qəhrəmanlıqdan sonra “bayquşlar”a sahib çıxmalıyıq. “Zirə”nin səfərdə oynamasına glincə, bu, bizi narahat etməməlidi. “Liv Bona Dea Arena”da Slovakiya “DAK 1904”ünü 4:0 hesabıyla məğlub edən “qartallar”, demək olar ki, növbəti mərhələyə vəsiqəni təmin edib. Komandanın gərək bir yox, iki-üç futbolçusu meydandan qovulsun ki, slovakiyalılar nəyəsə ümid edə.

Ümumiyyətlə, hər üç klubumuz mərhələni adlasa, Konfrans Liqasının 2-ci təsnifat mərhələsi nağılı bizim üçün xoş sonluqla bitəcək. Qoy belə olsun. Və həmin qələbələri həmin nağıllarda qeyd edildiyi kimi, göydən düşən üç almanın rəmzi hesab edək!

KƏNAN BAHADIR