“Bu, çoxdan müzakirə olunurdu - yəni necə, harda başlayım... Çox müzakirədən sonra qərara gəldim ki, ən yaxşısı aşağı yaş komandalarından başlamaqdı. Bəzi nüanslar var ki, onların üzərində işləmək istəyirəm. Sırf özümü akademiyaya yönəltdim ki, orda istədiyim hər yaş qrupu ilə təcrübəmi bölüşüm. Ən aşağı yaşlılardan başladım. Həm də paralel şəkildə məşqçilik kursunda oxuyacam. Ona görə də seçim belə oldu”.

“Avrokuboklarda çıxış edən komandalar ölkəmizi layiqincə təmsil etdi.  "Zirə" ilə "Sabah"ın böyükhesablı qələbəsi sevindirici oldu. Bu nəticə onlar üçün avantajıdı. Hətta "bayquşlar”ın səfərdə belə nəticəsi təqdirəlayiqdi. Görünür ki, hər iki komanda bu turu keçəcək. Çünki hesablar ürəkaçandı. Amma yenə də özləri çalışıb bu oyun üslubunu möhkəmlətməlidilər. Qətiyyən boş dayanmaq olmaz. Əsas odu ki, oyunun üstündə durub, onu yaxşılaşdırsınlar. "Sumqayıt"da isə qırmızı vərəqə baş məşqçinin planlarını alt-üst etdi. Ötən həftə "Zirə" də oxşar səbəbdən oyunu əldən vermişdi. Eyni ssenari "Sumqayıt"ın başına gəldi. Bu təcrübədi. Futbolçular indi başa düşəcəklər ki, qırmızı vərəqə əslində nədi. Bu, Azərbaycan çempionatı deyil. Avropada daim ən yaxşısını etməlisən ki, irəli gedə biləsən.  "Sumqayıt" elə komandadı ki, tez toparlana bilər. Səfərdə maraqlı oyun izləyəcəyik. İnanıram ki, “Sumqayıt” səfərdə yaxşı çıxış edə və mərhələ keçə bilər. "Sabah"la "Zirə"yə uğurlar arzulayıram. Onlara baxıram, istəyirəm ki, daha da irəli getsinlər. Son illərdə göründü ki, Rəşad Sadıqovun "Zirə"yə gəlişi ilə komanda möhkəmləndi, artıq başabaş mübarizə apara bilir. Hətta Avropada 4:0 da görə bilirik. Bu, bir ilin işi deyil. Eyni şeyi "Sabah" haqda da demək olar. Göründü ki, orda yaxşı futbolçu seçimi olub. Təcrübəli futbolçular gətiriblər. Elə baş məşqçi tapıblar kı, onunla oyunçular arasında yaxşı kommunikasiya yaranıb. Bunun sayəsində nəticə olur. Bir sözlə, bütün klublara uğurlar arzulayıram. Daim istəyərəm kı, ən yaxşısını edə bilsinlər”.