O, "Qarabağ"ın gənc hücumçusu Nəriman Axundzadə qədər tanınmır. Hər halda, "Xəzər Lənkəran"ın yetirməsi komandasını Avropa Liqasının 1/8 finalına daşıyan qolu vurub. Özü də Portuqaliya nəhənglərindən "Braqa"ya. Amma bəhs edəcəyim daha bir gənc də həmkarı qədər alqışı haqq edir.

Bəli, söhbət "Sabah"ın yetirməsi Xəyal Əliyevdən gedir. Futbolçunu daha yaxından tanımaq istəyənlər üçün qeyd edim ki, onun 20 yaşı var. Masazır təmsilçisi yarımmüdafiəçinin inkişafı üçün əlindən gələni əsirgəməyib. Hələ 2021-ci ilin yayında Xorvatiya "Dinamo"sunun heyətində təcrübə toplamasına da şərait yaradıb. Maraq üçün xatırladaq ki, Xəyal o vaxt Zaqreb təmsilçisinin U-18 komandasının heyətində "Kustoşiya"nın (Xorvatiya) 19 yaşlılarına qarşı oyunda (4:0) şans qazanıb, 3 məhsuldar ötürməylə yadda qalıb.

Əliyevin Misli premyer-liqasındakı debütü ötən mövsümün 21-ci turuna təsadüf edib. "Turan Tovuz"la matçda sonradan çans verilən futbolçu iki tur sonra "Kəpəz"lə oyunun start heyətində yer aldı və məhsuldar ötürmə müəllifi oldu. O, əvvəllər U-19 millimizin üzvü idisə, indi U-21-in şərəfini qoruyur.

Karyerasının hələ ki ən böyük uğuruna isə cümə axşamı imza atdı. Konfrans Liqasının 2-ci təsnifat mərhələsində - "Makkabi" ilə oyunda 83-cü dəqiqədə meydana çıxan Xəyal 88-ci dəqiqədə komandasının üçüncü qolunu vurdu. Onun ustalıqla vurduğu qol "Sabah"ın mərhələni adlamaq şansını xeyli artırdı.

Təəssüf ki, ölkəmizdə belə gənclərin sayı azdı. Yenə də "Sabah"ın Xəyalına, "Qarabağ"ın Nərimanına, "Sumqayıt"ın Səbuhisinə baxıb gələcəyimiz üçün ümid bəsləyə bilərik. Onların avrokuboklarda fərqlənməsi isə sinəmizi daha da qabardır.

Masazır təmsilçisinə gəlincə, "bayquşlar" özü də gəncdi. Klubun xəyalı azı onlarla Xəyal yetişdirmək olmalıdı. Axı Xəyalın fərqləndiyini görüb dərhal üzərinə qaçanlar, onunla birlikdə bayram edənlər, qısası, ən çox sevinənlər də bizimkilər idi: Amin Seydiyev, Tellur Mütəllimov və Namik Ələskərov...

Məhz Xəyala isə bəzi həmkarları kimi eqo və pul aşiqi olmağı yox, əzmlə hədəflərinə doğru addımlamağı arzulayıram!

KƏNAN BAHADIR