Olimpiada qalmaqalla start götürdü
Parisdə keçirilən Yay Olimpiya Oyunları qalmaqalla start götürüb. Argentina Futbol Assosiasiyası (AFA) Olimpiadanın futbol turnirində Mərakeşə qarşı oyundan sonra FİFA-nın Nizam-İntizam Komitəsinə şikayət edib.
Qurumun saytının yaydığı xəbərə görə, AFA rəsmi şikayətində lazımi tənzimləyici tədbirlərin görülməsini tələb edib:
“Gözəl idman növü olan futbolda oyunçuların təhlükəsizliyini təmin etmək vacibdi və biz bunun baş verməsi üçün lazım olan hər şeyi edəcəyik” .
İnsidentə gəlincə, Argentinanın və Mərakeşin U-23 komandaları arasındakı matç 61-ci dəqiqədə dayandırılıb. Argentinanın 2-ci qolundan sonra Mərakeş millisinin azarkeşləri meydana qaçaraq rəqib futbolçuların üzərinə fişəng atıblar. İğtişaşlar səbəbindən oyun dayandırılıb.
Matç iki saatdan sonra yenidən başlayan zaman VAR sistemi ilə vurulan qol yoxlanılıb və hakim qolu ləğv edib. Nəticədə Cənubi Amerika təmsilçisi 1:2 hesabıyla məğlub olub.
