Məlum olduğu kimi, “Zirə” “doğma divarlar” arasında “Şerif”ə məğlub olmaqla Avropa Liqasında mübarizəni dayandırdı.

Bakıda penalti seriyası hesabına mərhələ adlayan Moldova klubunun zəfərində “Qəbələ”nin sabiq oyunçusu Əyyub Allaş böyük rol oynadı. Oyunda 1 qol və 1 məhsuldar ötürmə ilə fərqlənən mərakeşli futbolçu sonda həlledici penaltini vurmaqla da komandasına fayda verməyi bacardı. Maraqlı məqam ondan ibarətdi ki, futbolçunun adı vaxtilə “Zirə” ilə yanaşı hallanırdı. Lakin qəfil “Şerif”də görünməsi ictimaiyyətdə suallar doğurmuşdu. Əksəriyyət oyundan sonra “qartallar”ı belə oyunçunu əldən verdiyinə görə tənqid atəçinə tutdu. Rəşad Sadıqov oyunsonrası mətbuat konfransında “Əyyub Allaşı almağa büdcəmiz yetmədi” deməklə bir növ vəziyyətə aydınlıq gətirdi. Amma belədə maraqlı sual doğur: Azərbaycanın elitası ilə vidalaşan bir klubdan oyunçu almağı bacarmayan “Zirə” Avropada nəyə ümid edir? “Şerif”in rəsmi səhifəsində Allaşın qələbə ilə bağlı açıqlamasını paylaşmasını da azərbaycanlı izləyicilər xoş qarşılamayıb.
"Football-plus.az" Əyyubla əlaqə saxlayaraq, suallarımıza cavab almağa çalışdı.

- Ümumiyyətlə, ilk məğlubiyyətdən sonra bu qələbə nə dərəcədə gözlənilən oldu? Rəqib və oyun haqda fikirləriniz.
- Qələbəyə görə sevinirəm. Bilirdik ki, çətin matç olacaq. İlk görüş fərqli keçmişdi, mən də zəif oynamışdım. Çünki komandaya sonradan qoşulmuşdum. İndi daha çətin oyun idi. Bildiyiniz kimi, qələbə qazandıq.

-  “Zirə” necə rəqibdi? Suma qırmızı almasaydı, belə nəticə qeydə alınardımı?
- “Zirə” yaxşı komandadı. Bizim üçün güclü rəqib idi. “Qırmızı” almasaydılar, nəticənin necə olacağını yalnız Allah bilir.

- Komandaya yeni transfer olunan futbolçulardan birisən. “Şerif”in əvvəlki illərlə müqayisədə zəiflədiyini düşünənlər var. Bu fikrə münasibətin?
- Bu, yeni komandadı, lakin zəifləməmişik. Təəssüf ki, bir-birimizi tanımaq üçün bir az daha çox vaxta ehtiyacımız var. Buna görə də adamlar zəiflədiyimizi düşünür.

-  “Qəbələ”də oynayanda cərimə zərbələrini sən yerinə yetirirdin. Burda da sənə tapşırılacağını gözləyirdik. Niyə belə olmadı?
- Cərimə zərbəsini kimin yerinə yetirməsi önəmli deyil. Yəni komandada kimə tapşırılması mənə fərq etmir. Biz sərbəst vuruşlar və penaltilər üçün birlikdə danışırıq. Ona görə də bu problem deyil.

- “Zirə” səni istədi, amma maliyyə baxımından razılaşa bilmədin, yoxsa elə əvvəldən “Şerif”i seçdin?
- Rəsmi təklif almadım, ona görə də həyat yoldaşım və agentimlə “Şerif”i seçdim. Buranı seçməyimdə problemin nə olduğunu anlaya bilmirəm.

- Komandanın rəsmi hesabında sevincini bölüşdüyün video birmənalı qarşılanmayıb. Yəni azərbaycanlı izləyicilər onlara sanki acıq verdiyini düşünürlər. Azərbaycana qarşı hansısa qəzəbin və ya kinin var?
- Azərbaycana qarşı heç bir kinim yoxdu. O gözəl ölkəyə gəldiyim ilk gündən məni yaxşı qarşıladılar. Gözəl insanlar tanıdım. Bu, mənim çox sevdiyim, oyunlarda qalib gəlmək istəyimdən yaranan emosiyalardı, yəni xarakterimdi. Amma Azərbaycana və ya kiməsə münasibətdə mənfi heç bir hiss yoxdu.

- Növbəti mərhələ haqda nə düşünürsən?
-  100 faiz çətin oyun olacaq. Avropa Liqasında asan oyun yoxdu. Amma meydana mərhələ adlamaq üçün çıxacağıq.

- Azərbaycanlı azarkeşlərə nə demək istərdin?
- Bütün azərbaycanlı izləyicilərimə demək istəyirəm ki, sizi sevirəm! İnşallah, bir gün yenə görüşəcəyik.

RÖYANƏ OĞUZ