Nəhayət, çoxdan gözlənilən hadisə iyulun 16-da baş verib: Kilian Mbappe rəsmən “Real”ın oyunçusu olub.

Onun bu kluba keçdiyi iyulun 3-də açıqlansa da, təqdimat mərasimi yalnız Avropa çempionatı sona çatandan sonra baş tutub.

Mbappenin sonuncu klubu PSJ idi. O, 2017-ci ildən oynadığı bu komandanı azad agent kimi tərk etmişdi. Ulduz futbolçu “Real”da “9” nömrəli formanı geyəcək. Buna “Santyaqo Bernabeu” stadionunda fransalı forvard üçün keçirilən təntənəli təqdimat mərasimindən əvvəl aydınlıq gəlmişdi. Xatırladaq ki, Kilian kluba azad agent kimi keçib. Daha əvvəl yayılan xəbərdə onunla 5 illik razılaşmanın əldə olunduğu bildirilmişdi. Mediada dünya çempionunun illik maaşının 30 milyon avro olacağı, ağ formada vuracağı qolların sayına görə bonus alacağı və müqaviləsində 1 milyard avroluq təzminat bəndinin olacağı barədə məlumatlar da yayılmışdı.

25 yaşlı Kilian təqdimat mərasimində arzusu gerçəkləşdiyi üçün xoşbəxt olduğunu deyib:

Çoxdan gözlənilən keçidin rəsmən açıqlanması İspaniya klubunu qısa müddətdə böyük məbləğdə irəli salıb. Kilian “Real”a bir gün ərzində 800 min avro qazandırıb. İspaniya mənbələrinin məlumatına görə, üzərində “Mbappe” yazılan formaların ilk satış günündə 7 mindən çox futbolka alınıb. “Real”ın bundan qazancı 800 min avro təşkil edib.

Yayılan digər xəbərdə Kilianın yeni komandasınn mövsümə hazırlıq keçəcəyi ABŞ turnesini buraxacağı bildirilib. “The Athletic” qəzetinin məlumatına görə, Karlo Ançelottinin çalışdırdığı komanda Amerikada 3 sınaq matçı keçirəcək. “Real”ın rəqibləri “Milan”, “Barselona” və “Çelsi” olacaq. Mbappe isə yeni mövsümə İspaniya klubunun bazasında hazırlaşacaq. “Real”ın planı fransalı futbolçunun Varşavada “Atalanta” ilə keçiriləcək UEFA Superkuboku matçında oynamasıdı.