“Sabah” Sloveniyadakı təlim-məşq toplanışı çərçivəsində sonuncu matçını iyulun 17-də keçirib.

"Football-plus.az" xəbər verir ki, “bayquşlar”ın budəfəki rəqibi Ukrayna “Rux”u olub. Maraq üçün qeyd edək ki, komanda premyer-liqa təmsilçisidi və ötən “futbol ili”ni 49 xalla turnir cədvəlinin 6-cı pilləsində bitirib. Masazırlıların baş məşqçisi Krunoslav Renduliçin seçdiyi start heyəti:

1. Yusif İmanov, 44. Sofian Çakla, 3. Con İrasabal, 7. Boyan Letiç, 4. Elvin Camalov (k), 2. Amin Seydiyev, 13. İvan Lepinitsa, 20. Coy-Lens Mikels, 28. Kahim Parris, 70. Cesse Sekidika, 9. Pavol Şafranko.

Ehtiyat oyunçular skamyasında əyləşənlər isə bunlardı:

16. Rüstəm Samiqullin, 22. Abdulla Rzayev, 6. Abdulla Xaybulayev, 33. Camal Cəfərov, 99. Neqoş Kupusoviç, 77. Şakir Seyidov, 17. Tellur Mütəllimov, 8. Ayaz Quliyev, 5. Rəhman Daşdəmirov, 88. Xəyal Əliyev, 11. İshak Belfodil.

Artıq 2-ci dəqiqədə hesabı ukraynalılar açıb. Rəqib cərimə zərbəsindən yararlanıb. “Sabah” hissə boyunca cavab qolunu vurmağa can atsa da, buna yalnız 2-ci uzatma dəqiqəsində nail olub. Parris bir neçə futbolçunun başını gicəlləndirərək topu tora qovuşdurub. Burda Lepinitsanın məhsuldar ötürməsini də qeyd edək. “Bayquşlar” növbəti dəfə 90-cı dəqiqədə fərqlənib. Bu dəfə Kupusoviç Ayazın qapı önünə ötürməsindən yararlanıb – 2:1.

Masazır təmsilçisi bununla da Sloveniya toplanışı bitirib. Xatırladaq ki, “Sabah” buna qədər “Koper”i (Sloveniya) məğlub edibsə (1:0, “Çukariçki” (Serbiya, 0:0) və “Krivbass” (Ukrayna, 2:2) ilə “sülh”ə razılaşıb.

KƏNAN BAHADIR