“Sabah” “Krivbass”a da qalib gələ bilmədi - REPORTAJ
“Sabah”ın növbəti mövsüm üçün hazırlıq prosesi Sloveniyada davam edir.
“Bayquşlar” hazırlıq çərçivəsində iyulun 13-də daha bir yoxlama oyununda meydana çıxıb. Budəfəki rəqib Ukraynanın “Krivbass” komandası olub. Masazır təmsilçisi “Brejitse” stadionunda keçirilən görüşdə rəqibini məyus edə bilməyib. Daha dəqiq desək, dörd qol vurulan matçda qalib müəyyənləşməyib – 2:2.
“Sabah”ın baş məşqçisi sözügedən oyunda aşağıdakı start heyətinə şans verib:
55. Nicat Mehbalıyev, 44. Sofian Çakla, 3. Con İrasabal, 7. Boyan Letiç, 4. Elvin Camalov (k), 2. Amin Seydiyev, 13. İvan Lepinitsa, 20. Coy-Lens Mikels, 28. Kahim Parris, 70. Cesse Sekidika, 9. Pavol Şafranko.
Mütəxəssisin ehtiyat oyunçular skamyasına əyləşdirdiyi futbolçular isə bunlardı:
1. Yusif İmanov, 16. Rüstəm Samiqullin, 22. Abdulla Rzayev. 6. Abdulla Xaybullayev, 33. Camal Cəfərov, 99. Neqoş Kupusoviç, 77. Şakir Seyidov, 17. Tellur Mütəllimov, 8.Ayaz Quliyev, 10. Namik Ələskərov, 5. Rəhman Daşdəmirov, 88. Xəyal Əliyev, 11. İshak Belfodil.
Əvvəla qeyd edək ki, “Krivbass” Ukraynanın premyer-liqa təmsilçisidi və ötən mövsüm 57 xal toplamaqla 3-cü yeri tutub. Krivoy-roqlular çempion “Şaxtyor”dan 14 xal geri qalıb.
Oyuna gəlincə, hər iki komanda fürəstləri ilk dəqiqələrdən əldə etməyə başlasa da, müdafiə xəttinin əzmkarlığı erkən sevincə mane olub. Hesabı 28-ci dəqiqədə penaltini dəqiq yerinə yetirən Con Morel Po açıb ki, Nicatın zərbəni dəf etmək cəhdi alınmayıb. “Sabah”ın cavab qolu 33-cü dəqiqəyə təsadüf edib. Mikels Sekidikanın ötürməsindən sonra topu tora qovuşdurub – 1:1. Lakin rəqibin hesabı dəyişməsi üçün çox vaxt lazım olmayıb. 35-ci dəqiqədə Po dubl edib. Matçın 63-cü dəqiqədə qeydə alınan dördüncü qolla bağlı isə maraqlı məqam var.
Belə ki, “Sabah”ın rəsmi sosial şəbəkə hesablarında sözügedən epizodda rəqibin avtoqola imza atdığı qeyd edilir. “Krivbass”ın saytında yayınlanan videoda isə həmin saniyədə İshak Belfodilin qol vurduğu iddia olunur. Təəssüf ki, həmin anda qapı önündə yaranan qarışıqlıq üzündən qolun müəllifini müəyyənləşdirə bilmədik. O bəllidi ki, “Sabah”ın yoxlama oyunu yetərincə gərgin mübarizə şəraitində keçib. İshak, Lepinitsa, Nicat və Mikels fəallığıyla seçilib.
“Krivbass”ın baş məşqçisi Vitali Vernidub (futbolçu kimi 2015-18-ci illərdə “Qəbələ”nin formasını geyib – red.) matçı belə dəyərləndirib:
“Sabah” güclü rəqibdi. Futbolçularımdan razı qaldım. Belə komandaya qarşı oynamaq maraqlı idi. Oyunçularım məğlub olmamaq üçün hər şey etdi”.
Komandanın qapıçısı Boqdan Xomanın fikirləriylə də tanış olaq:
“Yaxşı rəqibə qarşı yaxşı oyun göstərdik. Yeni mövsümə hazırlaşmağa davam edirik. Əlbəttə, məşq və rəsmi oyun fərqlidi. Rəqibimizə qarşı nəticə qənaətbəxş oldu. İnam yalnız əsl mübarizə şəraitində özünü göstərir. “Sabah”ın vurduğu qola görə üzgünəm. Belə epizodlarda uğurlu olmaq üçün daha çox çalışacam”.
Xatırladaq ki, bunadək Sloveniya “Koper”inə qalib gələn (1:0), Serbiya “Çukariçki”siylə heç-heçə edən (0:0) “bayquşlar” sabah “Rux”la (Lvov, Ukrayna) qarşılaşacaq və iyulun 18-də Bakıya qayıdacaq.
KƏNAN BAHADIR
