“Şamaxı” “İnter”, vaxtilə onun hüququ varisi olduğu iddia edilən “Keşlə” kimi klubların davamçısı sayılır. Artıq həmin komandalar tarixin tozlu səhifələrinə qarışıb. Özü də yetərincə ciddi problemlər içində üzdükdən, özünəməxsus çatışmazlıqlarla gündəmi zəbt etdikdən sonra.

Maraqlıdı ki, belə məsələlər sanki irsən davamçıya ötürülür. Odu ki, çox çaba sərf etdikdən sonra premyer-liqaya qayıdan “Şamaxı”da da həmin hadisələrin çalarları görünür.

Bəli, həm “İnter”, həm də “Keşlə” böyük maliyyə problemlərindən sonra “qeybə çəkildi”. İndi “şirlər” eyni “xəstəlikdən” əziyyət çəkir. Bilindiyi kimi, klub artıq elita təmsilçisidi. Ötən mövsüm 1-ci liqada mübarizə aparan komandanın hələ də ayrılan məşqçi və futbolçuların nəinki maaşını, mükafatını belə ödəmədiyi məlumdu. Bu üzdən həmin şəxslər müxtəlif media orqanlarına açıqlamalarında bunu dilə gətirir, klubun fəaliyyətindən gileylənir. “Şamaxı”nın idman direktoru Kamran İsmayılov bu barədə xeyli rahatdı. Yox, durumdan zövq aldığına görə belə demirik. Sadəcə, hər kəsə olan borcun qəpiyinə qədər ödəniləcəyinə əmindi. Düzdü, “şirlər” buna qədər daha bir neçə dəfə eyni çətinliklə üzləşib və öhdəsindən gəlib. Lakin bəs deyilmi?

Əlbəttə, günahı, sadəcə, “Şamaxı”nın idarəçilərində axtarmırıq. Çünki AFFA hələ klublara ayrılan maliyyə yardımının hamısını ödəməyib. İddialara görə, məlum gecikmənin səbəbi də məhz budu. Belədə bölgələrdə futbolun inkişafından danışarkən barmaq dişləməli deyilikmi? Qərbi premyer-liqada təmsil edən “Turan Tovuz”un maliyyə dayaqları güclüdü. Ehtiram Quliyevin “Huner Group”u “bozqurd”un korluq çəkməsinə imkan vermir. Amma sponsorsuz “Kəpəz”in durumu da bəllidi.

Qısası, “Şamaxı” indi premyer-liqadadısa, buna layiq davranmağa məcburdu. Onsuz da naxçıvanlılar ev oyunlarını Bakıda, gəncəlilər isə Tovuzda keçirəcək. Doğma publika önündə meydana çıxacaq iki bölgə klubundan biri olan “şirlər” ən qısa zamanda problemin öhdəsindən gəlməli və gələcəkdə gündəmdə, sadəcə, nəticələriylə olmalıdı. Sonra heç kim deməsin ki, futbolumuz Biləcəridən o yana keçmir...

KƏNAN BAHADIR