“Karyeramda yeni səhifə açıram” - İmmobile nə üçün “Beşiktaş”ı seçib?
Çiro İmmobilenin “Latsio”dan ayrılaraq “Beşiktaş” üçün Türkiyəyə gəldiyini xəbər vermişdik.
Bu transfer artıq reallaşıb və 34 yaşlı tanınmış italiyalı forvardla ikiillik müqavilə imzalanıb. Amma İstanbul nəhəngi tərəfindən yalnız futbolçunun məvacibi açıqlanıb. İmmobile Türkiyədə bir mövsümə 6 milyon avro qazanacaq. “Qartal”ın “Latsio”ya ödədiyi təzminata gəlincə, Türkiyə mətbuatı bunun 2 milyon avroya, “transfermarkt” portalı isə 3 milyon avroya bərabər olduğunu iddia edir. Maraqlıdı ki, yaxın keçmişdə A seriyasının bombardiri olmuş birdən-birə 3 futbolçu gələn mövsüm superliqada çıxış edəcək! Söhbət İmmobile, İkardi və Cekodan gedir. İmmobile 1 dəfə “Torino”, 3 dəfə “Latsio” ilə olmaqla 4 dəfə, İkardi 2014/15-də “İnter”in, Ceko isə 2016/17-də “Roma”nın heyətində bombardir olub. İmmobile Sloveniyada toplanışda olan komandanın düşərgəsinə yollanıb və dünən ilk məşqə çıxıb. Sizi onun mətbuat konfransında verdiyi açıqlamalarla tanış edirik.
* Rəhbərliyə təşəkkür edirəm. Çox sevincliyəm. 8 illik “Latsio” macərasından sonra karyeramda yeni səhifə açıram. “Beşiktaş” həqiqətən də mənə ehtiyac duyduğunu hiss etdirdi. Bu mövsüm önəmli işlər görmək və fanatlarımızı sevindirmək istəyirik. Fanatlarımıza bura ayaq basdığım ilk gündən mənə göstərdikləri marağa görə təşəkkür edirəm. Onlar üçün tərimin son damlasına qədər savaşıb əlimdən gələni edəcəm.
* Komanda üçün önəmli futbolçu olmaq, “Beşiktaş”a yardım etmək istəyirəm. İkardi də, Mertens də, Ceko da önəmli futbolçulardı. Bizi gözəl bir rəqabət gözləyir. Mövsüm çətin keçəcək. Amma əvvəlcə bizi avqustun 3-də vacib bir superkubok oyunu gözləyir. Həm o oyuna, həm də mövsümə yaxşı hazırlaşacağıq.
* Həm meydanda, həm də ondan kənarda önəmli rolum olacaq. “Beşiktaş” qol vurmaq baxımından liderlik keyfiyyətlərinə malik olan bir futbolçu axtarışında idi. Baş məşqçimizlə söhbət etmişəm. Mənə hansı mövqedə ehtiyac duyulacaqsa, orda da oynayacam. Komandamızda önəmli futbolçular var. Hansı mövqedə oynamağımdan asılı olmayaraq “Beşiktaş”a faydalı olmaq üçün hər şey edəcəm.
* Əsas özəlliyim hansıdı? Meydanın dərinliyinə endikdən sonra ordan qol epizodları yaxalamağa çalışıram. “Beşiktaş”da bunu həyata keçirmyimə yardım edə biləcək oyunçular var. Məşqlərdə belə məqamların üzərində çox işləməliyik ki, meydanda bir-birimizi daha yaxşı anlayaq. Hamımız birlikdə daha yaxşı komanda olmağa can atmalıyıq. Neçə qol vuracağımla bağlı heç vaxt söz vermirəm. Amma əlimdən gələni edəcəyimə söz verə bilərəm. Bütün qarşılaşmalarda qalib gəlmək istəyirəm.
* Dediyim kimi, “Beşiktaş”ın məni nə qədər çox istədiyini dərhal hiss etdim. Bu, ilk gündən diqqətimi cəlb etdi. İstanbul çox gözəl şəhərdi. Mənim kimi böyük ailəsi olan bir futbolçu komanda seçimi zamanı təbii ki, şəhəri də nəzərə alır. Danışdığım, məsləhət aldığım bəzi insanlar oldu. Bura gəlmədən öncə Türkiyəni yaxından tanıyan Siriqu, Mertens, Bonuççi ilə söhbətləşdim. Türkiyə çempionatında forvardların öz mahnılarının olduğunu bilirəm. Hər qoldan sonra həmin mahnı səslənir. Gərək mən də bir xeyli düşünərək bir mahnı seçim.
* Türkiyə futbolu barədə müəyyən məlumatlarım var. Burda böyük və sərt bir çempionatın olduğunu bilirəm. “Beşiktaş” fanatları da “Latsio” fanatları kimi çox atəşlidi. “Latsio”da azarkşlərlə münasibətlərim əla idi. 8 il boyunca məni sevdilər və dəstəklədilər. Eyni şeyləri burda “Beşiktaş” azarkeşləri ilə də yaşamaq istəyirəm. Bu qərarı vermək heç də asan olmadı. Çünki uzun illər yaşadığım və məni sevən bir şəhərdən ayrılmalı oldum. Amma futbolda belə ayrılıqlar olur. Gec-tez bir dönəm başa çatır və qərar vermək məcburiyyətində qalırsan. Mənim üçün də belə oldu. Ailəmlə birlikdə məsləhətləşərək bu qərarı verdik. Həm də rəhbərliyin bizə göstərdiyi maraq çox xoşumuza gəldi. Ailəlikcə belə bir şey axtarırdıq. “Beşiktaş”ın böyüklüyü və iddiası ilə İstanbulun gözəlliyini də nəzərə alaraq belə bir addım atdıq. İndi üzərimə düşən əsas şey ən qısa müddətdə formamı bərpa etməkdi.
Digər xəbərlər
