Azərbaycan Beynəlxalq Bankından götürdüyü kreditləri ödəmədiyinə görə İnterpolun 2015-ci ildən bəri axtarışa verdiyi azərbaycanlı biznesmen Nəsib Piriyev Maltanın futbol liqasına sponsorluq etməyə hazırlaşır.

“The Times of Malta” nəşri xəbər verir ki, Piriyev Londondakı şirkətinin adından sponsorluq müqaviləsi imzalayıb. Halbuki şirkət özü texniki baxımdan mövcud deyil. Xatırladaq ki, Maltanın futbol liqasına sabiq baş nazir Cozef Muskat rəhbərlik edir.
Qəzetin yazdığına görə, Nəsib Piriyevin sahibi və rəhbəri olduğu “360Sports” şirkəti Malta müəssisələrinin reyestrində qeydiyyatdan keçməyib, internetdə onunla bağlı bilgi toplamaq çətindi, sosial şəbəkələrdə də profili yoxdu. Piriyevin biznes imperiyasının təmsilçisi təsdiqləyib ki, şirkət həqiqətən də hələ qeydiyyat prosesindədi. O Maltada “360 Holdings Ltd” adı ilə qeydiyyatdan keçəcək və Böyük Britaniyada məskən salan PNN “Group Holdings” şirkətinin törəməsi olacaq. Şirkətin yaradılması hüquqi məsələdi, bunun vasitəsi ilə kommersiya qurumu təsis olunur və ayrıca hüquqi şəxs kimi təsdiqlənir.

Ötən həftə “360Sports” Malta premyer-liqasının 2024/25 mövsümünün rəsmi sponsoru kimi təqdim olunub. Bu sövdələşmə şirkətə həm də Maltanın futbol liqasının yüksək dəstəsi üzərində ad hüququ verir. Şirkətin adı liqanın yeni emblemində yer alacaq. Jurnalistlərə verilən məlumata görə, “360Sports” qarşıdakı üç il ərzində Malta çempionatının güclülər dəstəsinə 600 min avro yatırım edəcək. Şirkət onu da bəyan edir ki, video, sosial şəbəkələr, kiberidman, elektron kommersiya və pul qoyuluşlarını özündə birləşdirən idman əlavəsi hazırlamaq niyyətindədi. Şirkətin nəhəng genişlənmə planları da var. “360Sports”un saytında yer alan yol xəritəsindən aydın olur ki, şirkət 2025-ci ildə Asiya və Cənubi Amerikaya, 2026-cı ildə Şimali Amerikaya genişlənmək niyyətindədi.

Piriyevin rəhbərlik etdiyi “Woodford Finance” şirkətinin top meneceri bildirib ki, “360Sports” komandası çətin layihələrin gerçəkləşdirilməsi baxımından zəngin təcrübəyə malikdi. “Woodford Finance” şirkətinin baş əməliyyat direktoru Riçard Şirlinin “Times of Malta”ya dedikləri:

Ancaq belə böyük planlar “360Sports”un internet məkanındakı indiki varlığı ilə qətiyyən üst-üstə düşmür. “360Sports” şirkətinin veb saytı “Google”da “360Sports” adı ilə axtarış verərkən üzə çıxmır. Sayt kasaddı, orda promo-video, komandaların bioqrafiyası yer alıb, məhsulla bağlı təfərrüat yoxdu.

“360Sports”un arxasında dayanan Nəsib Piriyev futbolla bağlı layihələrdə debütant deyil. 2021-ci ildə məhz onun rəhbərlik etdiyi konsorsium İngiltərə premyer-liqasının təmsilçisi “Vest Hem”i 400 milyon funt sterlinqə (470 milyon avro) almağa çalışmışdı. Onda sövdələşmə baş tutmadı. Ona görə ki, klubun sahibi Devid Sallivan Piriyevin rəhbərlik etdiyi konsorsiumun “işin futbol tərəfinə heç bir maraq göstərmədiyini, bu əməliyyata, sadəcə, hansısa xüsusi mülkün bir şəxsdən başqasına keçməsi kimi baxdığını” bildirdi. Sonradan Piriyev “Derbi Kaunti” futbol klubunu da almağa çalışdı, ancaq bundan da bir şey çıxmadı.

Nəsib Piriyev bu qədər sərvəti 1993-cü ildə atası Nizami ilə birgə yaratdığı neft-qaz nəhəngi “PNN Group”un həmtəsisçisi kimi qazanıb. Ata Piriyev Rusiyanın enerji nəhəngi “Qazprom”a da rəhbərlik edib. “PNN Group” Mərkəzi Asiya ölkələrinə yanacaq çatdırılması, həmin coğrafiyada neft terminallarının tikintisi sayəsində varlanıb. Sonra isə şirkət başqa sektorlarda da fəaliyyətini diversifikasiya edib.
Xatırladaq ki, Azərbaycanın hüquq-mühafizə orqanları 2015-ci ildə Nizami Piriyevi kredit borclarını ödəmədiyinə görə saxlamışdı. Bakının Qaradağ rayonunda dəyəri yüz milyonlarla ölçülən metanol zavodu tikən ata Piriyev müflisləşdi və pulları qaytara bilmədi. Sonradan SOCAR Piriyevin kredit borclarını ödəyərək zavodu satın aldı. Nizami bəy azad olunsa da, həmin vaxt Londonda yaşayan oğlu Nəsiblə bağlı cinayət işi açıldı, onu beynəlxalq axtarışa verdilər. Düzdü, hazırda biznesmenin adı İnterpolun “axtarışda olanlar” siyahısında yoxdu.