Dünən AÇ-2024-də ilk yarımfinalçılar bəlli oldu.

Bu gün isə yoluna davam edən daha iki komandanın adına aydınlıq gələcək və 1/4 final mərhələsinə yekun vurulacaq. Bu afişada bugünkü oyunlar barədə danışacağıq. Onu da bildirək ki, 1/4 finaldan sonra bütün sarı vərəqələr silinəcək.

1/4 final
İngiltərə - İsveçrə 1:1 (5:3 - pen.)
Bukayo Saka, 80 - Brel Mbolo, 75.
Hakim: Daniele Orsato (İtaliya)
Cəzalı: Quehi/yoxdu
Stadion: “Merkur Şpil Arena” (Düsseldorf)
Əvvəlki oyunlarının balansı: +3=5-22

Bəlkə də turnirdən öncə İsveçrənin 1/4 finala yüksəlməsi sürpriz sayılardı. Amma Murat Yakının komandası bu turnirdə çox inamlı təsir bağışlayır. Son çempion üzərində əla qələbə qazanan və tam layiqli şəkildə adını ən güclü 8 komanda sırasına yazdıran İsveçrə bu dəfə son finalçını sınağa çəkəcək. İngiltərə bu duelin favoriti sayılır. Amma turniri izləyən hər kəs gözəl bilir ki, futbolun yaradıcıları bu mərhələyə “sürünə-sürünə” gəlib çıxıblar. Qrup mərhələsini 2 qolla tamamlayan ingilislər 1/8 finalda slovakları da çətinliklə keçdilər. Qaret Sautqeyt bəlkə də bu AÇ-də ən çox tənqid olunan məşqçilərin başında gəlir. “Üç şir” artıq gücünü və potensialını göstərməlidi. Slovakiya ilə oyundakı kimi komanda 90-cı dəqiqəyə 0:1-lə daxil olsa, çətin ki, bu dəfə isveçrəlilər hesabı bərabərləşdirməyə imkan versinlər. Bir çoxlarının fikrincə, indiki yığma İsveçrə tarixinin ən güclü komandasıdı. “Deyli Meyl”in məlumatına görə, İngiltərə son məşqlərdə 3-5-2 taktikasını sınaqdan keçirib. İsveçrə məhz bu sxemlə oynayır. Maraqlıdı ki, Murat Yakın 1/8 finaldan öncə “İtaliya 4 müdafiəçili sistemlə oynasa, onların bizə qarşı heç bir şansl olmayacaq” açıqlamasını vermiş və haqlı çıxmışdı. Bəziləri iddia edir ki, Sautqeytin gözünü məhz bu məqam qorxudub. Ona görə də İngiltərənin bu matçda seçəcəyi taktika indidən böyük maraq doğurur. Ötən qitə turnirində məhz bu mərhələdə İspaniyaya oyunsonrası penalti seriyasında uduzan İsveçrə yenidən tarixində ilk dəfə nəhəng turnirin yarımfinalına yüksəlməyə cəhd edəcək. Şəxsi oyunlarda İngiltərənin qorxunc üstünlüyü var. İsveçrə güclü rəqibi sonuncu dəfə 43 il öncə - 1981-in mayında məğlub edib. O vaxt DÇ-1982-nin seçmə mərhələsi çərçivəsində Bazeldə keçirilən oyunda meydan sahibləri 2:1 üstün olmuşdular. İngilislər həmin vaxtdan bəri İsveçrəyə qarşı 13 oyunun heç birində uduzmayıblar (10 qələbə, 3 heç-heçə). Hətta bu komandalar arasındakı son 5 oyunun hamısında İngiltərənin sevinən tərəf olduğunu da bildirək!

Niderland – Türkiyə 2:1
Stefan de Vray, 70. Mert Müldür 76 (ö.q) - Samet Akaydın, 35.
Hakim: Kleman Türpen (Fransa)
Cəzalı: yoxdu/Orkun Kökçü, İsmayıl Yüksək, Merih Dəmiral
Stadion: “Olimpiaştadion” (Berlin)
Əvvəlki oyunlarının balansı: +6=4-4

Uzun illərdən sonra, nəhayət, nəhəng turnirdə yaxşı nəticələr əldə etməklə bütün türk dünyasını sevincə qərq edən Türkiyə növbəti çətin sınaq ərəfəsindədi. Əslində indiki durum eynilə Avstriya – Türkiyə oyunundan öncə yaşanan ab-havanı xatırladır. Çünki yenə türkiyəli futbolsevərlərdən başqa heç kim “ay-ulduzlular”ın qələbəsinə inanmır. Avstriya kimi Niderland da aşkar favorit sayılır. 1/4 finalı “ay-ulduzlular” üçün artıq yetərincə yaxşı nəticə saymaq olar. Yəni komanda məğlub olsa belə, bu, faciə hesab olunmayacaq. Bu cəhətdən türklər meydana rahat və təzyiqsiz çıxacaqlar. Türkiyənin meydana təzyiqsiz çıxdıqda isə daha yaxşı təsir bağışladığını Avstriya ilə oyunda bir daha gördük. Amma digər tərəfdən, iştah diş altındadı. Türkiyə yaxın keçmişdə, həm DÇ-2002-də, həm də AÇ-2008-də fanatlarına yarımfinal həyəcanı yaşadıb. Niyə də daha bir yarımfinal olmasın?! Niderlandlılar çox özündənrazı görünür. Komandanın təcrübəli müdafiəçisi Deyli Blind “1/4 finalda Türkiyə ilə qarşılaşacağımızı nəzərə alsaq, şans bizim tərəfimizdədi” açıqlamasını verib.

Tanınmış niderlandlı mütəxəssis Quus Hiddink isə “Türkiyənin bizə problem yaradacağını düşünmürəm. Matçın taleyini ilk 60 dəqiqə ərzində həll edəcəyik” ifadəsini işlədib. Bu sözlərin türkiyəli futbolçuları nə dərəcədə qıcıqlandıracağını oyunda görəcəyik. “Ay-ulduzlular” mərhələ adlamaq üçün ideala yaxın oyun sərgiləməlidilər. Həm də komandanın yenə bir qəhrəmana ehtiyacı olacaq. Avstriya ilə görüşdə bu məsuliyyəti üzərinə Merh Dəmiral ilə Mərt Günok götürdü. Mərtə istənilən halda bu matçda yenə az iş düşməyəcək. Amma irəlidəki oyunçuların da artıq özlərini göstərmək zamanıdı. Avstriyaya qarşı oyun ilə bugünkü oyunun daha bir oxşar cəhəti var. Qardaş ölkənin komandası, bilindiyi kimi, həm də avstriyalılardan qisas almaq hissi ilə meydana çıxmışdı. Çünki bu ilin martında hazırlıq oyununda onlar Vyanada 1:6 hesabı ilə uduzmuşdular. Maraqlıdı ki, Türkiyə Niderlanda qarşı keçirdiyi son oyunda da məhz bu hesabla uduzub! Həmin qarşılaşma 2021-ci ilin sentyabrın 7-də Amsterdamda keçirilib.

DÇ-2022-nin seçmə mərhələsində keçirilən həmin oyundan sonra Şenol Günəş istefa vermiş və onu Ştefan Kunts əvəzləmişdi. İndi də Niderlandın heyətində olan Depay həmin gün het-trik etmişdi. Ancaq o matçdan öncə Türkiyə Niderlandı ardıcıl iki oyunda məğlub etmişdi. Qardaş ölkə güclü rəqibini 2021-in martında İstanbulda 4:2, 2015-in sentyabrında Konyada 3:0 yenmişdi. Yəni Niderland Türkiyə üçün məğlubedilməz rəqiblərdən sayılmır.