Səməd Nəsibov Berdıyevlə bağlı söhbətlərə aydınlıq gətirdi - “Ayxan Abbasov da..."
Fernando Santuş milliyə baş məşqçi təyin olunandan sonra yaşına görə tənqid atəşinə tutulsa da, Kurban Berdıyevin “Turan Tovuz”a təyinatına daha tolerant münasibət gördük.
Hələ nəzərə almaq lazımdı ki, Berdıyev Santuşdan daha yaşlıdı. Yaşdan söz düşmüşkən, türkmənistanlı mütəxəssisin sağlıq durumu ilə bağlı problemdən, daha doğrusu, yüksək təzyiqdən əziyyət çəkdiyi bildirilir. “Turan Tovuz” rəhbərliyi komandanın Ərzurumda toplanış keçməsini planlaşdıraraq otel bron etsə də, türkmənistanlı çalışdırıcının uzun müddətdi təzyiqdən əziyyət çəkməsi səbəbindən dəniz səviyyəsindən çox yüksəkdə yerləşən şəhərə gedə bilməməsi “Turan Tovuz”u ziyana salıb. Belədə komanda Ərzurumda yox, alternativ variant kimi Boluya keçmək fikrini də qəbul etməyib.
Bəs deyilənlər nə dərəcədə reallığı əks etdirir? Çünki klub rəsmiləri Qəbələdə toplanış keçdikdən sonra Türkiyəyə yollanacaqlarını bildirsələr də, konkret heç bir yer adı çəkməmişdilər. Mövzuyla bağlı daha detallı məlumat öyrənmək üçün klubun idman və əməliyyatlar üzrə direktoru Səməd Nəsibovla danışdıq:
“Ərzurumu kim deyir? Bunu hardan çıxardırlar? Elə bil kim nə fikirləşir, onu da yazır. Yay hazırlıq planı zamanı düşündüklərimiz yerlər arasında Bolu, Qızılcahamam ilə yanaşı, Ərzurum da var idi. Qiymətə, stadiona, qidalanmaya, qalacağın yerə baxırsan və sənə uyğun olanı seçirsən. Ərzurum, sadəcə, seçimlərimiz arasında olub, lakin seçməmişik. Biz Ankaraya, yəni Qızılcahamama gedəcəyik”.
Klub rəsmisinin Kurban Berdıyevin səhhətiylə bağılan yayılan xəbərlərə reaksiyası belə oldu:
“Səhhətiylə bağlı nə problem var ki? Kim yuxusunda nə görürsə, yazır. Ancaq nə məqsədlə yazır, bilmirəm. Məsələ başqadı. Ötən il Ayxan Abbasov da Ərzurumu istəməmişdi, onun da səhhətində problem var idi? Kurban müəllim səhhətində heç bir şey yoxdu. Sadəcə, bəlli bir yüksəkliyin olması müəyyən qədər təsir edir. Futbolçuların həmin yüksəkliyi qaldırıb-qaldırmamaq, yəni dəniz səviyyəsindən 1800 metr yüksəkdə toplanış keçəndən sonra Bakıya qayıdıb, dəniz səviyyəsindən 28 metr aşağıda oyun oynamaq, bura öyrəşmək var. Elə normal bir şəxsin bu iki fərqli yerə uyğunlaşması vaxt aparır. Futbolçuya gəlincə, o, ağır məşq prosesi keçir və 90 dəqiqə ərzində qaçır, hərəkət edir. Hamının bilmədiyi xırda incəliklər var”.
İdman direktoru komandanın yay toplanışının Qızılcahamamda olacağını təsdiqləsə də, yoldaşlıq oyunları üçün rəqiblərin hələ müəyyənləşmədiyini bildirdi:
“Bəli, Qəbələdən sonra Türkiyəyə yollanacağıq. Əvvəlcədən Türkiyədə toplanış keçəcəyimizi bilirdik. Çünki, həm viza, həm də bilet məsələləri daha rahatdı. Həmçinin əksər klublarımız Türkiyəyə gedir. Sadəcə, bizə sərf edən həm də ötən il getdiyimiz üçün tanıdığımız, bildiyimiz Qızılcahamam oldu. Bu üzdən də ora gedəcəyik. Yoldaşlıq matçı keçirəcəyimiz komandalar isə hələ bilinmir”.
Yeri gəlmişkən, Nəsibov Berdıyevin “Turan Tovuz”un süni ot örtüklü meydançasından narazılıq etməsinə də aydınlıq gətirdi:
“İstənilən məşqçi və ya futbolçu təbii ot örtüyündə oynamaq istəyir. Bu normaldı. Təbii ki, bu istiqamətdə müəyyən planlarımız var. Sadəcə, bizim bir meydançamız var və onu da söksək, işimiz çətin olacaq. Çünki orda təkcə əsas klomandanın oyunları keçirilmir. Stadionun ot örtüyünü indi söksək, təbii ot örtüklü qazon sentyabrın axırına ancaq hazır olar. O vaxta qədər də həm əvəzediciləri, həm də akademiyanın uşaqlarını yerbəyer etmək məsələsi var. Çünki onlar bir yerdə məşq edir. Uşaqları yerbəyer etmək həll olunsa, indi, yox, həll olunmasa, yəqin ki, mövsümün sonunda bu proses gerçəkləşəcək”.
KAMAL SƏFƏR
Digər xəbərlər
